Американинг ходимларсиз роборесторан стартапи 3 миллион доллар жалб қилди

Раундда Metaplanet инвесткомпанияси, Y Combinator акселератори ва хусусий инвесторлар - робототехник Питер Аббель, ресторатор Заид Аюб иштирок этди.

Mezli компанияси бутунлай автоном модуль ресторанлар яратади. Стартапга Стэнфорд университети муҳандислари Алекс Колчински, Алекс Грюбеле ва Макс Перҳам томонидан асос солинган.

Жамоа одатий қаҳвахона ва ресторанлар билан таққослаганда сифатли таомларни арзонроқ нархда таклиф этиши мумкин бўлган тизимни ишлаб чиқишни истади.

“Буррито бир тарелкасининг таннархи 3 доллар, бироқ иш ҳақи, солиқ ва бошқа харажатлар туфайли унинг қаҳвахонадаги нархи 10 доллар”, дейди Алекс Колчински. Бош ошпаз Эрик Минних билан биргаликда муҳандислар автоном ресторан ишлаб чиқди.

Ҳозирда Mezli ресторани прототипи Калифорниядаги KitchenTown компанияси офисида фаолият юритмоқда. Ресторан тахминан 18 м.кв жой эгаллаган. Бу масаллиқлар билан тўлдирилган алоҳида блоклардан иборат.

Ресторан Ўрта Ер денгизи усулидаги идишлар, шунингдек, гарнир ва ичимликлар таклиф этади. Таомлар нархи 4,99 доллардан бошланади. Фойдаланувчилар буюртмани онлайн ёки ресторан таблосида расмийлаштиришлари, ундан кейин эса “ақлли” шкафдан егуликни олишлари ёки етказиб беришни расмийлаштиришлари мумкин.

Компания қўлга киритилган маблағни 2022 йилда рестораннинг учинчи версиясини ишга тушириш учун йўналтиради. Бундан ташқари, келажакда компания модуль ресторанларни 3D принтерда чоп этишни режалаштирмоқда. Бу эса уларни одатдаги ресторанларга қараганда тезроқ ишга тушириш имконини беради.