Жанубий Африка Республикасининг собиқ президенти Фредерик Виллем де Клерк 85 ёшида вафот этди. Бу ҳақда Клерк фондининг саҳифасида хабар берилди.
Клерк саратон касаллиги сабаб вафот этган. Шу йил март ойида Клеркнинг ўзи унда кам учровчи тана саратони – мезотелиом аниқланганини эълон қилганди. Бу касаллик асосан инсон ўпкасининг фаолиятини ёмонлаштиради. Тезда даволанишни бошлаган Клерк июн ойида операция қилинганди. 2020 йил октябр ойида Клеркнинг ўғли ҳам 53 ёшида айнан шу касалликдан вафот этган.
Фредерик де Клерк 1989 йилдан 1994 йилгача ЖАР президенти бўлиб ишлаган. У мамлакатнинг охирги оқ танли президенти эди. Клерк 1990 йилда ЖАРда 33 йил жавом этган ирқий апартеид тизимига чек қўйиб, озодлик ҳаракати етакчиси Нелсон Манделани қамоқдан чиқаради. 1993 йилда Мандела ва де Клерк биргаликда тинчлик йўналишида Нобел мукофотини қўлга киритади.
1994 йилда Нелсон Мандела ЖАР президенти бўлгач, де Клерк 1996 йилгача икки йил давомида мамлакатнинг илк визе-президенти бўлиб ишлаган.
Маълумот учун, 1961 йилдан 1994 йилгача ЖАРда ирқий айирмачиликка асосланган апартеид ҳукм сурган. Бу вақт давомида мамлакатни 11 раҳбар бошқарган ва уларнинг барчаси оқ танли бўлган. Де Клерк апартеидни якунига етказгач, мамлакатни Нелсон Манделладан бошлаб фақат қора танли президентлар бошқариб келмоқда.
