“Минор” метро бекати қаршисида 72-йўналишдаги автобус йўлни кесиб ўтаётган пиёдани уриб юборди. Пиёда воқеа жойида ҳалок бўлди.
Фото: ИИББ ахборот хизмати
Жорий йилнинг 10 декабрь куни тахминан соат 18:40ларда Юнусобод туманида ўлим билан якун топган йўл-транспорт ҳодисаси юз берди. Бу ҳақда Тошкент шаҳар ИИББ хабар қилмоқда.
Маълумотга кўра, Юнусобод туманидаги Амир Темур кўчаси, “Минор” метро бекати қаршисида ҳайдовчи, 1990 йилда туғилган Т.Ж. бошқарувидаги 72-сонли йўналишли автобус ҳаракатланаётган вақтида, йўлнинг белгиланмаган қисмидан кесиб ўтаётган пиёда Т.У.ни уриб юборган.
Натижада, пиёда олган жароҳатлари билан воқеа жойида вафот этган.
Мазкур ҳолат юзасидан Тошкент шаҳар прокуратураси томонидан терговга қадар текширув ўтказилмоқда.
