Ўзбекистон ҳудудига жуда илиқ ҳаво кириб келиши кутилмоқда - «Ўзгидромет»

Бугун Ўзбекистон ҳудуди бўйича об-ҳавони антициклон периферияси белгилайди. Республика бўйича бироз ёмғир ва қор кўринишидаги кучсиз ёғингарчилик бўлиши эҳтимоли бор. Ҳаво ҳарорати 2-7 даража илиқни ташкил этади.

Фото: Kun.uz

“Ўзгидромет” хабарига кўра, эртага республика ҳудудига Кавказ ҳудудларидан салқин ва нам ҳаво кириб келиши кутилмоқда. Республика бўйича баъзи жойларда бироз ёғингарчилик (ёмғир, қор) бўлади, шимолда ва тоғли ҳудудларда қор ёғади. Фарғона водийси вилоятларида ёғингарчилик бўлиши эҳтимоли камроқ. Ҳаво ҳарорати 2 даража совуқ - 3 даража илиқ ўртасида, кундузи 3-8 даража илиқ атрофида бўлади.

9 февралда Тошкент, Андижон, Наманган, Фарғона вилоятларида кечаси ва эрталаб баъзи жойларда бироз ёғингарчилик (ёмғир, қор) бўлиши мумкин. Кечаси кучсиз совуқлар сақланиб туради, кундузи эса ҳаво ҳарорати 7-10 даража илиққача аста-секин кўтарила бошлайди.

Ҳафта ўртасидан республика бўйича об-ҳаво ўзгаради, ҳудудларга Эрон ҳудудларидан жуда илиқ ҳаво кириб келади. Ўзбекистон бўйича ёғингарчилик кутилмайди. Ҳаво ҳарорати кўтарилади ва меъёрий қийматлардан юқори бўлади, ҳафта охирига бориб кундузги ҳаво ҳарорати 12-15 даража илиққача, жанубда 18-20 даража иссиққача кўтарилади.

Ҳафтанинг катта қисмида кечаси ва эрталаб туман кузатилади. 7-8 февралда республиканинг тоғли ҳудудларида қор кўчиши хавфи бор.

#об-ҳаво #Ўзгидромет