18 февраль куни Ташқи ишлар вазирлигида Ўзбекистон Ташқи сиёсий фаолиятининг янги концепцияси лойиҳаси муҳокама қилинди. Бу ҳақда вазирлик матбуот хизмати хабар берди.
Ташқи ишлар вазирлиги ҳузуридаги Ташқи сиёсат кенгашининг Абдулазиз Комилов бошчилигида ўтказилган навбатдаги йиғилишида, шунингдек Кенгашнинг 2021 йилдаги фаолияти якунлари ва келгуси давр учун устувор вазифалар ҳам кўриб чиқилди.
«Ўзбекистон Республикаси Ташқи сиёсий фаолиятининг янги концепцияси лойиҳаси билдирилган фикр ва таклифларни инобатга олган ҳолда муҳокама қилинди», - дейилади расмий хабарда.
2021 йил 27 декабрь куни президент Шавкат Мирзиёев амалдаги версияси очиқ манбаларда йўқ бўлган Ташқи сиёсий фаолият концепцияси янги таҳрирда қабул қилинишини маълум қилган эди.
Шунингдек, концепцияни такомиллаштириш 2021 йилги давлат дастурига ҳам киритилиб, 1 декабргача тегишли норматив-ҳуқуқий ҳужжат лойиҳаси ишлаб чиқилиши белгиланган.
Кейинроқ, 2021 йилнинг 30 декабрь куни Ташқи ишлар вазири Абдулазиз Комилов бошчилигида ўтказилган ТИВ Ҳайъати мажлисида Ўзбекистон Ташқи сиёсий фаолиятининг янги концепцияси лойиҳаси ҳам муҳокама қилинган.
Kun.uz билан мулоқот қилган Ташқи ишлар вазирлиги расмий вакили Юсуфбек Қобилжонов янги концепция лойиҳаси дипломатлар ва бошқа мутахассислар томонидан кўриб чиқиш якунлангач, жамоатчилик муҳокамаси учун эълон қилинишини билдирган.
