Тошкентда «Спарк» уй деворига урилди

Тошкент шаҳрида “Спарк” автомобили иштирокида йўл-транспорт ҳодисаси содир бўлди. Бу ҳақда пойтахт ИИББ хабар қилмоқда.

2022 йил 21 февраль куни соат 18:17 да 102 тизимидан тушган хабарга кўра, шу куни соат тахминан 16:00 ларда Мирзо Улуғбек тумани Геофизика кўчасида ҳайдовчи – 1990 йилда туғилган Қ.А. “Спарк” русумли транспорт воситасини бошқариб кетаётиб, “Алишеробод” МФЙ қаршисида рул бошқарувини йўқотган ва уй деворига урилган.

Тўқнашув натижасида ҳайдовчи Қ.А. “чап болдир иккала суяклари ўрта учлигидан ёпиқ синиб майдаланиб силжигани, ўнг қўл 5-кафт соҳасида кесилган жароҳати борлиги, танасида кўплаб шилинган жароҳатлар борлиги” ташхиси билан шифохонага мурожаат қилган.

Мазкур ҳолат юзасидан Тошкент шаҳар ИИББ ЙҲХБ томонидан суриштирув ҳаракатлари ўтказилмоқда.