Уй-жой коммунал хизмат кўрсатиш вазирлигида ўзгаришлар амалга оширилди. Бу ҳақда “Нигоҳ” канали хабар бермоқда.
Қайд этилишича, Назиржон Назиров уй-жой коммунал хизмат кўрсатиш вазири ўринбосари лавозимидан озод этилди.
Унинг ўрнига Озода Жўраева тайинланди. У шу кунгача Навоий шаҳридаги “Ҳумо Зилола барҳаёт” профессионал бошқарув компанияси раҳбари сифатида фаолият юритган.
Озода Жўраева 5 март куни президент фармонига мувофиқ “Дўстлик” ордени билан тақдирланган.
Маълумот учун, Назиржон Назиров 2017 йилдан буён уй-жой коммунал хизмат кўрсатиш вазири ўринбосари сифатида ишлаб келаётганди.
Шерзод Ҳидоятов ҳозирги вақтда уй-жой коммунал хизмат кўрсатиш вазири сифатида ишлаб келмоқда. Унинг уч нафар ўринбосари бор - Соҳиб Саифназаров (вазир биринчи ўринбосари), Қурбон Турсунов (вазир ўринбосари), Назиржон Назиров (эндиликда вазир собиқ ўринбосари).
