Мактабларни қуриш ва таъмирлашнинг янгича механизми жорий этилади

Президентнинг “Халқ таълими тизимидаги муассаса ва ташкилотларини қуриш, реконструкция қилиш ва мукаммал таъмирлашнинг янгича механизмини яратиш чора-тадбирлари тўғрисида”ги қарори лойиҳаси эълон қилинди.

Қурилиш вазирлиги, Иқтисодий тараққиёт ва камбағалликни қисқартириш вазирлиги, Молия вазирлиги, Жиззах, Сирдарё Тошкент вилоятлари ва Тошкент шаҳар ҳокимликларининг Халқ таълими вазирлиги ҳузуридаги “Халқ таълими соҳасида лойиҳа ҳужжатларига техник топшириқларни ишлаб чиқиш ва қурилиш объектлари сифатини мониторинг қилиш бўйича инжиниринг компанияси” давлат унитар корхонасининг буюртмачилик ваколати ва унинг ҳудудий филиаллари фаолиятини тугатиш тўғрисидаги таклифлари маъқулланади.

Бунда:

“Инжиниринг компанияси” ДУК томонидан марказлашган манбалар ҳисобидан лойиҳа-қидирув, қурилиш-монтаж ишлари амалга оширилаётган объектларни тегишинча Жиззах, Сирдарё, Тошкент вилоятлари ва Тошкент шаҳар ҳокимликлари ҳузуридаги “Ягона буюртмачи хизмати” инжиниринг компаниялари буюртмачилигида амалга оширилиши белгиланади;

Халқ таълими вазирлиги ҳузуридаги “Халқ таълими соҳасида лойиҳа ҳужжатларига техник топшириқларни ишлаб чиқиш ва қурилиш объектлари сифатини мониторинг қилиш бўйича инжиниринг компанияси” давлат унитар корхонаси “Халқ таълими соҳасида лойиҳа ҳужжатларига техник топшириқларни ишлаб чиқиш ва қурилиш объектларида сифат назорати хизмати” давлат унитар корхонаси этиб қайта номланади.

Халқ таълими вазирлиги “Инжиниринг компанияси” ДУКнинг 2022 йил инвестиция дастури доирасида Жиззах, Сирдарё, Тошкент вилояти ва Тошкент шаҳридаги умумтаълим объектлари бўйича жорий йил 1 майига қадар йилдан йилга ўтувчи лойиҳалари тегишли ҳужжатларини топшириш ва қабул қилиш далолатномалари асосида Жиззах, Сирдарё, Тошкент вилоятлари ва Тошкент шаҳар ҳокимликлари ҳузуридаги “Ягона буюртмачи хизмати” инжиниринг компанияларига тақдим этилишини таъминлайди.

2022 йилнинг май ойидан бошлаб Жиззах, Сирдарё, Тошкент вилоятлари ва Тошкент шаҳридаги халқ таълими тизими объектларини қуриш, реконструкция қилиш ва капитал таъмирлаш бўйича буюртмачи функциялари тегишлилиги бўйича “Ягона буюртмачи хизмати” инжиниринг компанияларига юкланади.

Белгилаб қўйилишича, 2022 йил 1 майдан бошлаб давлат бюджети ва давлат мақсадли жамғармалари маблағлари, шунингдек, маҳаллий бюджетларнинг қўшимча манбалари ҳисобидан умумтаълим мактаблари қурилиши, реконструкция қилиниши ва мукаммал таъмирланиши Қурилиш вазирлиги томонидан ишлаб чиқиладиган “Намунавий мактаб” лойиҳалари асосида (2022 йил 1 майгача ишлаб чиқилган ва ишлаб чиқиш жараёнида бўлган лойиҳалар бундан мустасно) амалга оширилади.