Қашқадарё тоғларида бедарак йўқолган сурхондарёлик чўпоннинг жасади топилди

Қашқадарё вилояти ИИБ ахборот хизматининг хабар беришича, 2022 йил 11 май куни Деҳқонобод туман ИИБга Сурхондарё вилояти Ангор тумани Чинобод маҳалласида яшаган, 1995 йилда туғилган Э.З. Деҳқонобод тумани ҳудудида бедарак йўқолгани ҳақида хабар келиб тушган.

Шундан сўнг вилоят ИИБ ЖҚБ, Қамаши ҳамда Деҳқонобод тумани ИИБ ходимлари, маҳаллий аҳоли, овчилар, ўрмон ишчилари ҳамда вилоят ФВБ ходимларидан иборат қидирув гуруҳлари тузилган. Улар томонидан Деҳқонобод ва Қамаши туманининг тоғли ҳудудларидаги ғорлар ва сойликлар кўздан кечирилиб, яқин атрофда чорва молларини боқиб юрган чўпонлар билан тезкор-суриштирув ишлари олиб борилган.

Дастлабки суриштирувларда аниқланишича, 2022 йил 2 апрель куни Э.З. Ангор туманида яшовчи Ж.Б. ва Ж.К. билан бирга чорва молларини Жарқўрғон туманидан Сурхондарё вилояти Сариосиё туманининг Қашқадарё вилоятининг Яккабоғ туманига туташ тоғларига боқиш учун ҳайдаб чиқиб кетиб, 2 май куни Қамаши тумани давлат ўрмон хўжалиги 13-квартал Қалоқ-Қўтон участкаси ҳудудида бедарак йўқолган.

Олиб борилган қидирув тадбирлари давомида 2022 йилнинг 20 май куни Қамаши тумани давлат ўрмон хўжалигининг 13-кварталидаги Қалоқ-қўтон номли ер майдони ҳудудидаги тахминан 100–120 метр чуқурликдаги жарлик тубидан бедарак йўқолган фуқаро Э.З.нинг жасади топилиб, марҳум олиб чиқилган.

Қайд этилишича, мазкур ҳолат юзасидан Қамаши тумани прокуратураси томонидан терговга қадар суриштирув ишлари олиб борилмоқда.