Ганада хавфли Марбург вируси аниқланди. Икки киши вафот этган

Иккала ҳолат ҳам жанубий Ашанти минтақасида содир бўлган. Ташхис тасдиқланган беморлар шифохонада вафот этган. 

Марказий ва Шарқий Африка мамлакатларида Маргбург вирусининг тарқалиши эҳтимоли юқори, аммо бу жуда кам учрайди. Шундай бўлса-да, Гана ҳукумати вазиятга жиддий ёндашмоқда. 98 киши аллақачон қаттиқ карантинга юборилган.

Вирусдан ўлим даражаси 50 фоизни ташкил қилади, аммо ЖССТ касаллик белгиларини даволаш имкониятлари чекланган мамлакатларда бу юқорироқ экани ҳақида огоҳлантирмоқда.

Марбург вируси тана суюқликлари - қон, нажас, тер ва тупук орқали юқади. Дастлабки босқичларда беморнинг боши ва мушаклари оғрийди. Титроқ ва ҳолсизлик пайдо бўлади.

Касаллик давомида белгилар кучаяди, жигар билан боғлиқ гепатит (сариқ) хасталиги келиб чиқади. Вазн йўқотиш, оғиз ва бурундан қон кетиши кузатилади.

Касаллик одатда уч ҳафта давом этади. Беморнинг ҳаётини сақлаб қолиш учун жигар фаолиятини қўллаб-қувватлаб туриш ва тана ҳароратини тушириш керак.

Керакли дори-дармонлар танқис бўлган мамлакатларда вирус беморларнинг ўлимига олиб келади.

Марбург вирусининг ташувчилари одатда учар тулкилар ҳисобланади. Гана ва бошқа Африка мамлакатлари ҳукуматлари аҳолини бу сутэмизувчилар яшайдиган ғорлардан қочишга ва ҳар қандай гўштни яхшилаб пиширишга чақирмоқда.

Вирус биринчи марта 1967 йилда Германиянинг Марбург шаҳрида аниқлангани боис шу номни олган. Ўша пайтда ундан 7 киши ўлган эди. Бироқ, кейинчалик Европада бундай ҳолатлар такрорланмади.

Марбург вирусининг энг ҳалокатли эпидемияси 2005 йилда Анголада содир бўлиб, 200 дан ортиқ одамнинг ўлимига олиб келган.

Конго, Кения, Уганда ва Жанубий Африкада ҳам вируснинг тарқалиши қайд этилган.