“Тадбиркорлар ўзини эркин ҳис қилолмаяпти” — Ислом Жасимов

17 август куни президентнинг тадбиркорлар билан учрашуви олдидан “Тадбиркорлар билан мулоқот” ҳафталиги бошланди, дея хабар бермоқда Kun.uz мухбири.

Тошкентдаги тадбирда сўз олган Савдо-саноат палатаси раисининг биринчи ўринбосари Ислом Жасимов тадбиркорлар эркинлиги ва хусусий мулк дахлсизлигига оид муаммолар ҳақида гапирди.

“Шахсан мени хавотирга соладиган нарса – тадбиркорларнинг фаолиятига ноқонуний аралашув. Ҳеч бунинг олдини ололмаяпмиз. Шу мазмунда 500тага яқин мурожаат тушди. Давлат органи бўладими, ҳуқуқни муҳофаза қилувчи органларми – жиноий жавобгарлик борлигини билиб туриб, қўрқмасдан тадбиркорнинг ишига аралашади. Тадбиркор ўзини эркин ҳис қилмаяпти”, – деди Ислом Жасимов.

У хусусий мулк ҳимояси ҳақида гапираркан, бу борада 155та мурожаат келиб тушганини таъкидлади. Унинг сўзларига кўра, 2012 йилда қабул қилинган иккита қонун: “Хусусий мулкни ҳимоя қилиш ва мулкдорлар ҳуқуқларининг кафолатлари тўғрисида” ва “Тадбиркорлик фаолияти эркинлигининг кафолатлари тўғрисида”ги қонунлар замон талабига жавоб бермаяпти.

Бундан ташқари, ССП вакили Жиноят кодексининг 192-1-моддаси (хусусий мулк ҳуқуқини бузиш) санкциясини кучайтириш кераклигини айтди. Бу моддадаги жиноятлар учун 200 БҲМ жаримадан 7 йилгача озодликдан маҳрум қилишгача бўлган жазо турлари белгиланган.

“Тадбиркорларнинг ўз хусусий мулки бўйича ишончи кучли эмас. Қонун бор, жиноий жавобгарлик бор. Жиноий жавобгарлик масаласига келсак, 192-1-моддада хусусий мулкка тажовуз қилиш жазоси жуда ҳам енгил. Буни юрист сифатида айтяпман. Маъмурий жавобгарликка тортилгандан кейингина жиноий жавобгарликка тортиш мумкин. Жиноий жавобгарликнинг жазо турлари ҳам жуда енгил. Ваҳоланки, бу – хусусий мулк, у юксак даражада ҳимоя қилиниши керак.

Тегишли органлар, бошқа шахслар хусусий мулкка тажовуз қилиш қатъиян ман этилганини тушуниб етмаяпти. Хусусий мулкка тажовуз учун жиноий жавобгарликни кучайтириш масаласи кўриб чиқилса тўғри бўлар эди”, – дейди у.

Ислом Жасимовга кўра, тадбиркорларнинг эркинлиги масаласи биринчи ўринда туриши керак.

“Айнан эркинликни таъминлаш ҳаммамизнинг вазифамиз бўлиши керак. Бугун тадбиркор Ўзбекистонда ўзини қанчалик эркин ҳис қилади? Бугун у шу ерда бир нарса қурса, 3 йилдан кейин шу мулк ноқонуний олиб қўйилмаслигига ишонадими? Тадбиркорлар ўзи туриб айтсин.

2012 йилда қабул қилинган “Тадбиркорлик фаолияти эркинлигининг кафолатлари тўғрисида”даги қонунда давлат 16 та кафолат берган. Менимча, бу қонун ҳам бугунги кун талабларига жавоб бермаяпти. Шу қонунни ҳам бутунлай янги таҳрирда қабул қилиб, тадбиркорнинг эркинлигини таъминлаш учун аниқ-аниқ нормалар киритиш керак”, – дейди ССП раисининг биринчи ўринбосари.