Путин ва Си Цзинпин Индонезиядаги G20 саммитига келишни режалаштирмоқда

Бўлажак саммитнинг кўплаб иштирокчилари Украинадаги уруш туфайли Путиннинг иштирокини муаммоли деб билишяпти. G20 саммитига Украина президенти Володимир Зеленский ҳам таклиф қилинган.

Фото: Reuters

Россия президенти Владимир Путин ҳам, Хитой раҳбари Си Цзинпин ҳам Индонезиянинг Бали оролидаги «катта йигирматалик» (G20) саммитида иштирок этишни режалаштирган. «Си Цзинпин келади. Президент Путин ҳам келишини менга айтди», деди Индонезия президенти Йоко Видодо 19 август, жума куни эълон қилинган Bloomberg ахборот агентлигига берган интервьюсида.

Видодо Путинга саммитга таклифнома юборган, бироқ Кремл ҳали Россия президентининг иштирокини расман тасдиқламади. Bloomberg на Россия, на Хитой томонидан G20 саммитида давлат раҳбарларининг иштироки ҳақидаги тасдиқни ололмади.

Ғарбда Путиннинг G20 саммитидаги иштироки муаммоли деб ҳисобланяпти, чунки конференцияга Россия томонидан қуролли тажовузга учраган Украина президенти Володимир Зеленский ҳам таклиф қилинган. Ғарб давлатлари Украинадаги уруш туфайли Россия сиёсий жиҳатдан яккаланиб қолиши керак, деб ҳисоблайди ва агар Владимир Путин конференцияга келса, Балидаги G20 саммитида иштирок этмаслиги мумкин.

АҚШ ва Хитой ўртасидаги муносабатлар сўнгги вақтда кескин ёмонлашди. Бунга АҚШ Конгресси Вакиллар палатаси спикери, АҚШда президент ва вице-президентдан кейин учинчи ўринда турувчи сиёсий етакчи Нэнси Пелоси ҳамда бир гуруҳ АҚШ конгрессменларининг яқинда Тайванга қилган ташрифи сабаб бўлди. Бунга жавобан Хитой Тайван яқинида кенг кўламли машқлар ўтказди. Пекин Тайванни Хитойнинг исёнкор провинцияси деб билади ва керак бўлса, уни ўз назоратига қайтариш билан таҳдид қилмоқда.