Биринчи марта хато қилган кичик бизнес вакилларига жазо чораси қўлланилмайди

Кичик бизнес вакиллари томонидан солиқ текширувлари билан боғлиқ жарималар тури кўплиги ва оғирлиги масаласи бўйича жуда кўплаб мурожаатлар келиб тушди. Бу ҳақда президент Шавкат Мирзиёев айтиб ўтди.

Фото: Президент матбуот хизмати

Қайд этилишича, бугунги кунда айланмадан солиқ тўлаётган 370 мингдан зиёд кичик тадбиркорларнинг солиқ бўйича ўртача ойлик тўлови 1 миллион сўм атрофида.

Касса чеки бермагани учун 5 миллиондан 10 миллион сўмгача молиявий, шунингдек 3 миллиондан 12 миллион сўмгача маъмурий жарима солинади. Яъни, кичик тадбиркорлар учун ҳам, йирик корхоналар учун ҳам жазо бир хил.

Савдо соҳасида фаолият кўрсатадиган тадбиркорларни қарийб 30 йилдан бери қийнаб келадиган муаммо ҳам ечилади, яъни савдо қоидаларини бузганлик учун жиноий жавобгарлик тўлиқ бекор қилинади (Жиноят кодексининг 189-моддаси).

Биринчи марта хато қилган кичик бизнес вакилларига жазо чораси қўлланилмайди. Бунинг ўрнига камчиликларни бартараф этишга солиқ идоралари кўмакчи бўладиган тизим жорий этилади.

Жарималар миқдори ҳам тадбиркорлар тўлаётган солиғидан ошиб кетмаслиги керак.

Муаллиф: Отабек Матназаров

#бизнес #Шавкат Мирзиёев