Қонунга хилоф равишда ишдан бўшатилган 925 нафар шахс ишга тикланди

Қонунга хилоф равишда ишдан бўшатилган 925 нафар шахс ишга тикланди, тўланмай қолган 61 млрд сўмлик иш ҳақлари ундирилди. Бу ҳақда Бош прокуратура ҳузуридаги Мажбурий ижро бюроси мутасаддилари маълум қилди.

МИБ органлари томонидан ўтган даврда жами 21,8 трлн сўмлик ундирувлар амалга оширилди (ўтган йилнинг шу даврига нисбатан 3,7 трлн сўм кўп). Давлат фойдасига 8,5 трлн сўм, тадбиркорлик ва бошқа субъектлари фойдасига 6 трлн сўм, банкларга 5,8 трлн сўм ва фуқаролар манфаатлари учун 1,4 трлн сўмдан ортиқ ундирувлар бажарилган.

Эҳтиёжманд фуқароларни қўллаб-қувватлаш учун жорий этилган «Темир дафтар», «Аёллар дафтари» ва «Ёшлар дафтари»га 416,4 млрд сўм ёки ўтган йилнинг мос даврига нисбатан 69,1 млрд сўм кўп маблағ йўналтирилган.

Моддий ёрдамга муҳтож фарзандлар фойдасига 1 трлн сўмдан ортиқ алимент пуллари ундирилган, шундан 9,2 млрд сўмлик 61 та уй-жой ва 636,6 млн сўмлик 8 та транспорт воситаси алимент олувчиларга олдиндан тўлов сифатида берилиши таъминланди.

20 мингга яқин ишсиз алимент тўловчи ишга жойлаштирилган, 41 мингдан ортиқ оилаларни яраштиришга эришилган.

Тайёрлаган: Отабек Матназаров

#иш #МИБ