Норвегияда Владимир Путиннинг дўстининг ўғли ҳибсга олинди

Норвегияда Россия темирйўллари собиқ раҳбари ва Россия президенти Владимир Путиннинг ишончли шахсларидан бири бўлган Владимир Якуниннинг ўғли Андрей Якунин Шпицберген узра ноқонуний равишда учувчисиз учоқни учиргани учун ҳибсга олинди. Андрей Якунин 17 октябр куни Норвегия шимолидаги Ҳаммерфестда қўлга олинган, деб хабар берди Норвегия полицияси 19 октябр, чоршанба куни.

Россия-Британия фуқароси Шпицберген архипелаги устида ноқонуний равишда учувчисиз учоқни учирганини тан олди. Якунин тергов изоляторида, унинг дронлари ва бошқа электрон қурилмалари мусодара қилинган, деб хабар берди полиция.

Сўнгги кунларда бу Россиянинг Украинага қарши уруши туфайли Европанинг Россия газига қарамлиги камайиши фонида Европа иттифоқига газ етказиб бериш бўйича муҳим таъминотчига айланган Норвегияда учувчисиз учоқларни ноқонуний учириш ва ноқонуний суратга олиш учун Россия фуқароларининг еттинчи ҳибсга олинишидир. 

Норвегия бош вазири Йонас Гар Стёре Норвегия аэропортлари яқинида янги учувчисиз учоқлар парвози муносабати билан «хорижий разведка хизматларининг Норвегия аэропортлари узра учувчисиз учоқлар учириши»ни номақбул деб атади. «Руслар Норвегия устидан учувчисиз учоқларни учиришга ҳаққи йўқ», деди у.

Ундан бир неча соат аввал Норвегия ғарбидаги Берген аэропорти яқинида учувчисиз учоқ ҳаво қатновини қисқа муддатга тўхтатиб қўйган эди. Сўнгги пайтларда Норвегияда УУА парвозлари Норвегия энергетика инфратузилмаси объектлари ҳудудида, шу жумладан газ ишлаб чиқариш платформалари ҳудудида бир неча бор қайд этилган.