Германия канцлери Путин унга таҳдид қилгани ҳақидаги хабарни рад этди

Россия президенти билан музокаралар чоғида Путин томонидан таҳдид қилингани ҳақидаги хабарлар «ёлғон», деди Олаф Шолц Welt am Sonntag ҳафталигига берган интервьюсида.

Германия канцлери Олаф Шолц Россия президенти Владимир Путин у билан икки томонлама суҳбатларда гўёки Украинадаги урушни кенгайтириш билан таҳдид қилгани ҳақидаги хабарларни рад этди. Бу ҳақда Германия вазирлар маҳкамаси раҳбари Welt am Sonntag ҳафталигига берган интервьюсида маълум қилди, ундан парчаларни 22 октябр, шанба куни нашр ўз веб-сайтига жойлаштирди. 

«Ушбу музокаралар чоғида таҳдидлар бўлгани ҳақидаги тахминлар, мен ўқиган хабарлар ёлғондир», деди канцлер. Бундан ташқари, Шолц Германиянинг Россияга энергетика қарамлиги хавфини аллақачон англаб этганини айтди. 

Путиннинг энергия манбаларидан «қурол сифатида» фойдаланиши ҳақида гапирар экан, Германия ҳукумати раҳбари шундай деди: «Менга эрта босқичдаёқ ишлар шу даражага етиб келиши мумкинлиги аниқ эди». Канцлер ўшанда шундай хулосага келганини билдирди: «Россиядан келадиган арзон газдан фойдаланишимиз мумкин, лекин ўзимизни унга қарам қилмаслигимиз керак, бошқа таъминот манбаларини ривожлантиришимиз лозим». 

Ҳамбург мэри сифатида у Германиянинг шимолий қирғоғида суюлтирилган табиий газ (СТГ) терминалларини қуришни ёқлаган, деб маълум қилди Шолц. «Афсуски, ҳеч қандай натижа бўлмади», деди канцлер. Сиёсатчининг сўзларига кўра, Германия молия вазири бўлган даврда у бу мақсадига эришишда давом этган. «Олдинги ҳукумат Брунсбюттел, Штаде и Вильгельмсхафенда СТГ терминалларини қуришни режалаштиришни иқтисодий жиҳатдан фойдалироқ қиладиган қонун қабул қилди», деди Шолц. Бугун Германия бундан фойда кўрмоқда, деб ҳисоблайди у. 

Шу билан бирга, канцлернинг сўзларига кўра, ўша босқичда лойиҳалар учун молиявий ҳомийларни топишнинг иложи бўлмаган, шунинг учун инвестициялар амалга оширилмаган. 

Бироқ, Олаф Шолц аввалги ҳукумат - Ангела Меркел таркибида бўлганида энергия таъминотини диверсификация қилиш бўйича ўз позициясида ёлғиз бўлганми, деган саволга жавоб беришни истамади. «Канцлер лавозимига сайланганимдан кўп ўтмай, мен канцлерликдаги масъул тузилмалардан Россиядан келаётган газ тўхтаб қолса, нима қилишимизни сўрадим. Афсуски, бу борада ҳеч қандай режалар йўқ эди», - деди Шолц. 

Аввалроқ, 20 октябр куни WDR ва NDR жамоат телерадиокомпаниялари журналистлари канцлер ўз ҳукуматининг олти вазирлари фикрига зид равишда Ҳамбург порти акцияларининг бир қисмини хитойликларга сотишга рухсат бериш ниятида эканини маълум қилган эди. COSCO давлат компанияси бўлиб, денгиз юк ва контейнер ташиш бўйича дунёнинг етакчиларидан бири. Бунга жавобан «Иттифоқ-90/Яшиллар» ва либерал Эркин демократик партия аъзолари Россия гази билан боғлиқ тажрибани эслатди.

Германиянинг адлия вазири, либерал Марко Бушман сўзларига кўра, «Германиядаги ҳеч қандай муҳим инфратузилманинг Хитой ҳукумати назорати остига тушишига йўл қўйиб бўлмайди. Бу мустақиллик масаласидир». Бушман Хитой билан ҳам Россия бўйича бир хил хатони такрорламасликка чақирди.