Шольц: Путин G20'да танқидларни эшитгиси келмади

Россия президенти Владимир Путин G20 саммитида иштирок этиши мумкин эди, бироқ бошқа давлатлар томонидан Россияни танқид қилиш кучайиб бораётгани сабабли бу ғоядан воз кечди. Бу фикрни Германия канцлери Олаф Шольц 13 ноябрь, якшанба куни Ханойда журналистлар билан суҳбат чоғида билдирди, унинг сўзларидан Reuters иқтибос келтирмоқда.

Шольцнинг сўзларига кўра, Путин анжуманга келса, «яхши бўларди». «Аммо ўшанда у дунёнинг кўплаб давлатлари тузган барча саволлар ва танқидларга дуч келиши керак эди. Катта эҳтимол билан у келмайди», - деди Германия канцлери.

Аммо Путиннинг йўқлиги Россиянинг Украинага қарши уруши муҳокамасига таъсир қилмайди, деди Шольц. Жаҳон ҳамжамияти Кремлга «ҳарбий кучайишга йўл қўйиб бўлмаслиги ва тинчликни таъминловчи таклифлар бўйича, шу жумладан, Россия расмийлари, Россия президенти томонидан қадамлар қўйилиши керак»лигини очиқ айтди. «Шунинг учун биз халқаро қоидаларга риоя қилиш, қонун кучдан устун туриши кераклигини аниқ кўрсатувчи фикрни шакллантириш устида қаттиқ ишлаяпмиз», — деди канцлер.

Путиннинг 15—16 ноябрь кунлари Бали оролида (Индонезия) бўлиб ўтадиган G20 саммитида иштирок этишдан бош тортгани анжумандан бир неча кун олдин маълум бўлди. Бироқ саммитда учрашувлар чоғида Украина мавзусини кўтаришга ваъда берган АҚШ президенти Жо Байден, Хитой етакчиси Си Жинпинг ва Украина президенти Володимир Зеленский иштирок этади ва иштирокчиларга видеомурожаат қилади.

Саммитда Путин ўрнига Россиядан ташқи ишлар вазири Сергей Лавров қатнашади. Шу билан бирга, июль ойида G20 саммитига сўнгги сафари чоғида россиялик вазир яккаланиб қолганди – йиғилиш иштирокчилари у билан бир гуруҳ бўлиб суратга тушмаган, Лавров эса нутқидан сўнг дарҳол мажлислар залидан чиқиб кетган.

Путиннинг ўзи уруш бошланганидан бери Россиядан ташқарига камдан-кам чиқяпти - бундай сафарлардан бири унинг июль ойида Теҳронга қилган ташрифи бўлиб, унда Россия президенти ва унинг эронлик ҳамкасби Иброҳим Раисий Эроннинг камикадзе дронларини етказиб бериш масаласини муҳокама қилишган. 

Октябрь ойида Остонада бўлиб ўтган Осиёда ҳамкорлик ва ишонч чоралари бўйича кенгашнинг 6-юбилей саммитига эса Путин охирги бўлиб келган эди – шунинг учун Қозоғистон президенти Қосим-Жўмарт Тўқаев уни кутиб олишга чиқмади. Бундан ташқари, айрим конференция иштирокчилари Кремль раҳбари билан саломлашмаган.

Октябрь ойида Москва ғалла битимидан бир томонлама чиқиб кетганидан кейин Украина Россияни G20'дан чиқаришга чақирди. Бу ғояни АҚШ президенти Жо Байден қўллаб-қувватлаган ва агар бу муваффақиятсизликка учраса, у Украинани G20'га киритишни таклиф қилган. Шу билан бирга, мамлакат G20'га аъзо давлатлар рўйхатига киритилмаган бўлса-да, унинг президенти Володимир Зеленский йиғилишга расмий таклиф олди.

Жорий йилнинг бошида Германия канцлери Олаф Шольц Россия билан G20 форматини сақлаб қолиш тарафдори бўлган эди. Бироқ, Шольц, агар у учрашувда иштирок этса, саммитда Россия президенти Владимир Путин билан музокаралар столига ўтиришга рози бўлиши ёки бўлмаслигини аниқ айта олмади.