Сколари мураббийлик фаолиятини якунлади

«Бош мураббий сифатидаги фаолиятимни якунлайман. Ёрдамчим Пауло Турруни жамоамизнинг навбатдаги мураббийи этиб тайинлайман, ўзим эса техник директор бўламан», — деди Сколари Furacao Live'га берган интервьюсида. 

Сколари икки марта Бразилия миллий жамоасини бошқарган. 2002 йилда у жамоани 5-бор жаҳон чемпионига айлантирган, 2013 йилда Конфедерациялар Кубоги қўлга киритилган. 

Клублар миқёсида 74 ёшли мутахассис икки бор Либертадорес Кубогини ютган — 1995 йилда «Гремио» ва 1999 йили «Палмейрас» билан. Шунингдек, ушбу клублар билан икки марта — 1996 ва 2018 йилларда Бразилия чемпионатида ғолиб чиққан. 

Шунингдек, у Португалия миллий жамоаси (2003-2008 йиллар) ва «Челси»да ҳам ишлаган. Португалларни Евро-2004да финалга, ЖЧ-2006да яримфиналга олиб чиққан. 

Сколарининг мураббийлик фаолиятидаги сўнгги клуби ўтган мавсумда Бразилия чемпионатида 6-ўринни эгаллаган «Атлетико Паранаэнсе» бўлди.