UzAuto Ўзбекистон-Қозоғистон минтақалараро бизнес форуми доирасида 570 миллион АҚШ долларилик сармоявий ва савдо-иқтисодий шартномалар имзолади (реклама ҳуқуқи асосида)

Жорий йилнинг 21 декабр куни Ўзбекистон ва Қозоғистон ишбилармон доиралари ўртасидаги бизнес-форум давомида инвестициялар ва ташқи савдо вазири Жамшид Хўжаев ва Қозоғистон Республикаси Бош вазири ўринбосари Серик Жумангарин, UzAuto Motors, Қозоғистон Тараққиёт банки ва Allur компанияси (Қозоғистон) қўшма лойиҳаларни амалга ошириш бўйича 570 миллион долларлик қатор шартномалар имзолади.

“UzAuto Motors” АЖ ва Қозоғистон Тараққиёт банки Қозоғистонда "Allur" автомобил заводи қувватларида кичик ҳажмдаги йиғиш усули бўйича йилига 30 000 дона “Chevrolet Onix” автомобилларини ишлаб чиқариш лойиҳасини молиялаштириш бўйича келишувга эришишди. Лойиҳани амалга ошириш учун тахминан 50 миллион долларга яқин инвестициялар жалб қилинади, бу эса "UzAuto Motors"га Қозоғистонда ўз мавқейини мустаҳкамлаш ва бошқа потенциал экспорт бозорларини ўзлаштиришга имкон беради.

UzAuto Motors ва "Allur" ўртасидаги Қозоғистонга "Allur" заводига 500 миллион долларлик автомобил комплектлари ва бутловчи қисмлари экспорти ҳажмини ошириш бўйича имзоланган келишув ҳам Ўзбекистон экспорт потенциалини кенгайтиришга хизмат қилади.

UzAuto Motors, Қозоғистондаги лойиҳалардан ташқари, қозоғистонлик ҳамкорлари билан Ўзбекистонда замонавий, инновацион эҳтиёт қисмлар тарқатиш марказини жорий этишда ҳамкорлик қилиш бўйича келишувга эришди. Ушбу келишув натижаси Ўзбекистонга 20 миллион доллар миқдорида инвестицияларни жалб қилиш, шунингдек, логистика занжирлари ва етказиб бериш йўналишларини оптималлаштириш ҳамда юкларни ташиш харажатларини камайтириш бўлади.

Ҳамкорликни истиқболли ривожлантириш режасида томонлар бозорларнинг эҳтиёжлари ва истеъмолчилар талабидан келиб чиққан ҳолда автомобиллар қаторини янгилаш ва кенгайтириш имконияти тўғрисида келишиб олишди. Автомобилсозлик соҳасидаги ўзаро манфаатли ҳамкорлик икки давлатнинг иқтисодий тараққиётига янги туртки беради, минтақавий ҳамкорликни кенгайтиради, бу орқали экспорт бозорларини янада ривожлантириш учун мустаҳкам пойдевор яратади.

Реклама