Молдова бош вазири Наталя Гаврилица бу лавозимда бир ярим йил ишлаганидан сўнг ҳукумат билан биргаликда истеъфога чиқишини эълон қилди.
Молдова ҳукумати бош вазир Наталя Гаврилица билан биргаликда истеъфога чиқди. Бу қарор мамлакат президенти Майя Санду билан маслаҳатлашувлардан сўнг қабул қилинди, деди Гаврилица 10 февраль, жума куни. «Ҳукуматда бир ярим йил ишлаганимдан сўнг, истеъфога чиқишимни эълон қилиш вақти келди. Биз инқирозга учраган ҳукуматда ҳокимиятга келдик ва ривожланиш, коррупцияга қарши кураш ва ЕИга интеграция сиёсатини олиб бордик», - дейди у.
Наталя Гаврилицанинг сўзларига кўра, ҳукумат ўз фаолияти давомида «энергетика шантажига дуч келган». «Улар биз таслим бўлиб, миллий манфаатларга хиёнат қилган аввалги ҳукуматлар каби иш тутамиз деб ўйлашди, аммо ундай эмас. Биз узлуксиз инқироз режимида ишладик», - дея таъкидлади Гаврилица.
Майя Санду бош вазирга «катта фидойилик ва саъй-ҳаракатлар учун» миннатдорчилик билдирди, шунингдек, Гаврилица инқироз даврида ҳукуматни бошқарганини таъкидлади. «Мисли кўрилмаган қийинчиликларга қарамай, мамлакат масъулият билан, катта эътибор ва фидокорона меҳнат билан бошқарилди. Бизда барқарорлик, тинчлик ва тараққиёт бор - бу ерда бошқалар уруш ва банкротликни хоҳлади», деб ёзади Молдова президенти.
Қонунга кўра, ҳукуматни истеъфога чиқариш тўғрисидаги фармон давлат раҳбари томонидан имзоланиши керак, вазирлар маҳкамаси эса янги ҳукумат қасамёд қилгунига қадар ўз вазифаларини бажаришда давом этади.
Шу куни президент Санду Молдова Хавфсизлик кенгаши котиби, президентнинг хавфсизлик масалалари бўйича маслаҳатчиси Дорин Речанани бош вазир лавозимига номзод сифатида кўрсатиш ҳақидаги фармонни имзолади. Парламент фракциялари билан маслаҳатлашувлардан сўнг, парламентда кўпчиликни ташкил қилувчи (63 депутат) ҳукмрон «Ҳаракат ва бирдамлик» партияси (PAS) фракцияси Речан номзодини қўллаб-қувватлашини маълум қилган.
Россиянинг Украинага бостириб кириши туфайли Молдова 2022 йилда энергия инқирозига дуч келди. «Энергетика хавфсизлиги хавф-хатарлари биз дуч келаётган асосий нарсадир – Украина орқали уланиш туфайли, чунки бизда Руминия энергетика тизимига уланиши мумкин бўлган юқори вольтли линия йўқ», деди Гаврилица ўтган йилнинг декабрида DW нашрига.
Унинг сўзларига кўра, Молдовада Россиянинг Украина инфратузилмасига берган зарбалари туфайли бутун мамлакат бўйлаб икки марта электр энергияси тўлиқ ўчирилган. Бундан ташқари, Россия республикага газ етказиб беришни сезиларли даражада чеклаб қўйган ва уни бутунлай тўхтатиш билан бир неча бор таҳдид қилган. Кишинёв таъминот ҳажмининг қисқаришини тўлов масалалари билан боғлиқ бўлмаган сиёсий қарор деб атади.
Молдова ташқи ишлар вазири Нику Попеску ноябрь ойида Европа Иттифоқининг республикага зарурий ёрдамини энергия нархи ошиши сабабли 1,1 миллиард еврога баҳолаган эди. Россиянинг Украинага қарши уруши бошланганидан бери Молдова учун донорларнинг иккита конференцияси бўлиб ўтган ва уларда 600 миллион еврога яқин маблағ йиғилган. Бундан ташқари, Германия, Франция ва Руминия бу давлат учун ҳамкорликда ёрдам платформасини яратган.
2022 йил июнь ойида ЕИнинг 27 давлати давлат ва ҳукумат раҳбарлари Молдовани Европа Иттифоқига аъзоликка номзод сифатида тан олди.
