Туркиянинг Ҳатай вилоятида 5 магнитудали зилзила юз берди

23 феврал куни Туркиянинг Ҳатай вилоятида 5 магнитудали зилзила содир бўлди, деб хабар берди TRT Haber.

Ҳатайда содир бўлган ер силкиниши оқибатида электр таъминотида узилишлар бошланган. Қурбонлар ва вайронагарчиликлар ҳақида маълумотлар йўқ.

Турк матбуоти маълумотларига кўра, зилзила Тошкент вақти билан соат 18:53 да 9,7 км чуқурликда юз берган, силкинишлар эпицентри Дефне округида бўлган.

20 феврал куни Ҳатайнинг Дефне ҳудудида 6,4 магнитудали зилзила содир бўлган эди. AFAD нашри худди шу куни Дефнеда содир бўлган яна иккита зилзила (5,8 ва 5,2 магнитудали) ҳақида хабар берди. Улар камида 11 кишининг ўлимига олиб келди, 1 мингдан ортиқ Туркия ва Сурия аҳолиси жабр кўрди.

6 феврал куни Туркия ва Сурияда 7,8 магнитудали ҳалокатли зилзилалар содир бўлди. Сўнгги маълумотларга кўра, Туркияда силкинишлар оқибатида юзага келган вайроналар оқибатида 43 мингдан ортиқ киши ҳалок бўлган. Сурияда ҳалок бўлганлар сони 8,5 мингдан ошган.