“Биргина хатонинг бадали ўлим” – aжал билан ёнма-ён юрадиган касб эгалари

Ҳайвонот боғларида томошабинларга панжара ортидан бироз ювош кўринадиган йиртқич ҳар қандай ҳолатда йиртқичлигини қилиб қолиши мумкин. Аммо барча ҳайвонлар қаторида уларни ҳам боқиш, озиқлантириш керак бўлади. Албатта, бу анчагина хавфли бўлган иш. Кичкинагина эътиборсизлик ҳам ҳайвон боқувчисининг ҳаётини хавф остида қолдириши мумкин. Шу сабабли, шер, йўлбарс ёки айиқнинг қафасига кириш ажал билан ёнма-ён туришдек гап.

Йиртқич ҳайвонлар қандай боқилади, улар нималар билан озиқланади? Умуман, ҳайвон боқувчиларнинг касби қай даражада хавфли? Kun.uz мухбири Андижон ҳайвонот боғида бўлиб, ушбу касб эгаси билан суҳбатлашди.

Мазкур ҳайвонот боғида ҳозирги кунда 9 нафар ҳайвон боқувчиси ишлайди. Эҳтиётизлик ёки белгиланган тартибларга риоя этмаслик улар учун доимо хавфли. 

“Йиртқич ҳайвонлар қафасига 2-3 киши бўлиб кирамиз: бир киши ташқарида туради, икки киши ичкарида ҳайвонларга озуқа беради. Йиртқич ҳайвонларга эътибор билан қаралади. Олдинроқ содир бўлган ҳолатга ҳам эътиборсизлик сабаб бўлган. Шеригимиз айиқ мени яхши кўриб қолди, деб ўйлаб қафасга ёлғиз кирган. Агар қафасларни қулфлаб кирганида ҳалок бўлмаслиги мумкин эди.

Йиртқич ҳайвонларнинг хотираси бир йилда янгиланади. Шунинг учун улар бир ёшга етгунича ўзимиз олдига киришимиз мумкин. Бироқ бир ёшдан сўнг қафасини алоҳида қиламиз ва олдига умуман кирмаймиз”, – дейди ҳайвон боқувчи Режабали Йўлдошев.

Ҳайвонот боғидаги йиртқичларни қўлга ўргатиб бўлмайди. Улар циркдагилардан фарқ қилади. Бу касбнинг ҳам ўзига яраша қийинчиликлари бор.

“Катта шер ва йўлбарсларга 15-20 килограммдан сифатли тоза гўшт берилади. Сал айниган гўшт касал қилиб қўйиши мумкин. Ёввойи ҳайвонларга катта-кичиклигига қараб озуқа берилади”, — дея таъкидлайди боқувчи Режабали Йўлдошев.

Андижон ҳайвонот боғида айни пайтда шер, йўлбарс, айиқ, бўри ва бошқа йиртқичлар боқилмоқда. 

Абдували Қурбонов