«Дизелгейт»: Audi компаниясининг собиқ раҳбари шартли қамоқ жазосини олди

Volkswagen концернининг дизел двигателли автомобилларида дастурий таъминот билан фирибгарлик иши доирасида Audi компаниясининг собиқ раҳбари Руперт Штадлер 27 июнь, сешанба куни бир йил-у тўққиз ойлик шартли қамоқ жазосига ҳукм қилинди. Бундан ташқари, Мюнхендаги суд унга давлат бюджети ва бир қатор нотижорат ташкилотлар фойдасига 1,1 миллион евро миқдорида жарима тўлаш мажбуриятини юклади. 

Жараён давомида Штадлер фирибгарлик бўйича айбини тан олди. Хусусан, у дастурий таъминотдаги фирибгарлик АҚШда маълум бўлганидан кейин дастурий таъминоти ўзгартирилган қилинган автомобилларнинг Германияда сотилишини тўхтатмаганликда айбланган. 

2020 йил сентябрида Мюнхенда бошланган суд жараёни дизел можароси бўйича биринчи жиноий суддир. Узоқ вақт давомида Руперт Штадлер ўзига қарши барча айбловларни рад этди. Март ойида суд топ-менежерга қуйидаги келишувни тузишни таклиф қилди: Штадлер айбини тан олади ва бунинг эвазига 18 ойдан 24 ойгача шартли қамоқ жазоси билан 1,1 миллион евро жаримага тортилади. Штадлер ва унинг адвокатлари бунга рози бўлди. 

Худди шу куни муҳандис Жованни П.га нисбатан ҳам худди шундай ҳукм чиқарилди, фарқи шундаки, унинг жаримаси 50 000 евро бўлиши белгиланди.