Исроил парламенти суд ислоҳотининг биринчи қисмини биринчи ўқишда қабул қилди

Кнессет (Исроил парламенти) Олий суд ваколатларини чеклаш ва бутун мамлакат бўйлаб оммавий норозиликларни келтириб чиқарган суд-ҳуқуқ ислоҳотлари пакетининг биринчи қонун лойиҳаси учун биринчи ўқишда овоз берди. Бу ҳақда 11 июль, сешанба куни The Jerusalem Post хабар бермоқда.

Биринчи ўқишда «оқилоналик стандарти» деб аталмиш – Олий суднинг ҳукумат қарорларини асоссиз деб ҳисоблаган ҳолда қайта кўриб чиқиш ҳуқуқини бекор қилувчи қонун лойиҳаси қабул қилинди. Кнессетнинг 64 нафар депутати бундай ҳуқуқнинг бекор қилиниши учун овоз берди, 56 нафари қарши чиқди. 

Энди қонун лойиҳаси иккинчи ва учинчи ўқишда овоз беришга қайтишдан олдин қайта кўриб чиқиш учун Кнессет қўмиталарига юборилиши кутилмоқда, деб ёзади The Jerusalem Post. 

«Ростини айтинг. Бу қонун сизга судланган вазирни тайинлаш имконини беради. Ҳукуматга қарши чиққан ҳар бир кишини ҳибсга олиш учун ордер юборишга рухсат берувчи қонун. Бу қонун сизга бош прокурорни ишдан бўшатиш имконини беради. Сизнинг хўжайинингиз Нетаняхуга (бош вазир) келишув бўйича музокаралар олиб бориш имконини яратади», - дея овоз бериш натижаларига изоҳ берди мухолифат лидери ва Кнессет аъзоси Яир Лапид. 

Кнессетнинг Конституция, қонунчилик ва адлия қўмитаси раиси Симха Ротман қонун лойиҳасини тақдим этар экан, уни «мувозанатли ва масъулиятли» деб атади. Унинг сўзларига кўра, амалдаги «стандарт» Олий судга ҳаддан ташқари кенг ваколатлар беради. 

Аввалроқ, мухолифат биринчи ўқиш муваффақиятли ўтса, 11 июль куни оммавий норозилик намойишлари ўтказишга ваъда берган эди. Акциялар, жумладан, Тел-Авив марказида ва Бен Гурион аэропортида режалаштирилган. Ярим йилдан ортиқ давом этаётган ҳафталик норозилик намойишларидан фарқли равишда ташкилотчилар «Исроил жамиятининг турли қисмларини иш ташлашга», университетлар, компаниялар ва савдо марказларини ёпишга чақирмоқда.