Ҳақиқий сафарбарлик энди бошланади — Шавкат Мирзиёев

Сайланган президент Шавкат Мирзиёев инаугурация маросимидаги нутқида сайловнинг эртаси куниёқ белгилаб олинган мақсадларни амалга ошириш бўйича қатъий ҳаракатлар бошланганини айтиб ўтди.

У вақт, ҳаёт кутиб турмаслигини таъкидлади.

«Биз сайловнинг эртаси куниёқ белгилаб олинган улкан мақсадларни амалга ошириш бўйича қатъий ҳаракатларни бошладик. Чунки вақт, ҳаёт бизни кутиб турмайди. Даврнинг ўзи барчамизни тезкор бўлишга, керак бўлса, вақтдан ўзиб ишлашга ундамоқда.

Кимки «Сайлов ўтди – сафарбарлик тугади», деб  ўйласа,  хато  қилади. Ҳақиқий сафарбарлик энди бошланади. Чунки халқимиз бизга ишониб топширган катта-катта режа ва дастурларни ўзимиз бажармасак, айтинг, четдан ким келиб бажариб беради?

Келгуси етти йилга мўлжаллаб ишлаб чиқилган стратегик мақсадларга эришиш учун бизда барча куч ва имкониятлар бор.

Қудратли халқимизга таяниб, ақл-заковатимиз, билим ва тажрибамизни ишга солиб, ислоҳотларимиз суръати ва самарасини янада оширамиз, ҳеч қачон сусайтирмаймиз. Қанчалик қийин ва машаққатли бўлмасин, танлаган йўлимиздан ортга қайтмаймиз.

«Ҳар бир кун – бу имконият, ҳар бир кун – бу келажак пойдевори» деган шиор бугундан бошлаб ҳаётимиз қоидасига, ҳар қайси раҳбарнинг, барча халқ ноиблари, вазир ва ҳокимларнинг кундалик фаолият дастурига айланиши шарт», – деди давлат раҳбари.