Кучли сув тошқинлари: Словения ЕИ ва НАТОдан ёрдам сўради

Словения кенг кўламли сув тошқинларига олиб келган ҳамда узоқ давом этган ёмғирлардан сўнг, табиий офат оқибатлари билан курашишда давом этмоқда. STA агентлигининг 7 август, душанба куни хабар беришича, қурбонлар сони олти нафарга етди, улардан икки нафари Нидерландия фуқароси. Сава, Драва ва Мура дарёлари водийлари сув остида қолмоқда.

Словения Европа Иттифоқи ва НАТОдан вайронкор сув тошқинлари ва кўчкилар натижасида етказилган зарарни бартараф этиш учун техник ёрдам сўради. 

Расмийлар сув йўлларини тартибга солиш учун турли қувватдаги 30 та экскаватор ва 30 та махсус машина, шунингдек, механизмларга техник хизмат кўрсатиш учун муҳандислик гуруҳларини сўраган, дея хабар беради dpa. Шунингдек, Люблянага ҳар бирининг узунлиги 40 метргача бўлган 20 та йиғма кўприк керак. Расмийлар НАТОдан юк ташиш учун камида 5 тонна юк кўтариш қувватига эга бешта ҳарбий вертолёт, шунингдек, қутқарув ва ёрдам ишларини бажариш учун 200 нафар аскар сўраган. 

Шимоли-шарқдаги Мурска Собота ва шимолдаги Словень-Градец шаҳарлари яқинида ўт ўчириш бригадалари камида 57 та қутқарув операциясини ўтказди. Йўллар ва темирйўллар сув остида қолган. Бош вазир Роберт Голоб жами зарарни 500 миллион евродан ортиқ деб баҳолади. Мамлакат ҳудудининг учдан икки қисми ва энергетика инфратузилмаси, шунингдек, юзлаб турар жой бинолари зарар кўрган, деб ёзади dpa.