Зеленский: «Пригожинни Путин ўлдирди, бизда шундай маълумот бор»

Украина президенти Володимир Зеленскийнинг айтишича, «Вагнер» ХҲК асосчиси Евгений Пригожинни Россия президенти Владимир Путин ўлдиртирган. Зеленский бу ҳақда Киевда, «Ялта» саммитидаги чиқишида айтди.

Фото: Володимир Зеленский Telegram-канали

«Путин Пригожинни ўлдирди, ҳар ҳолда бизда шундай маълумот бор. Биз Пригожиннинг ўлимини бир террорчи камайди деб қабул қилдик», деди Зеленский.

Украина президентининг айтишича, Пригожиннинг ўлими мамлакат учун яхши хабар бўлган: «Русларнинг руҳияти тушиб кетди, ахир улар мана шу вагнерчилар ортига беркинганди-да. Улар вагнерчилар, ёлланма жангчилар ҳаёти эвазига тузилган ҳимоядан айрилишди. Бу қайсидир маънода биз учун плюс», деди Володимир Зеленский.

Украина етакчиси айнан қайси маълумотга таяниб Пригожиннинг ўлимида Путиннинг қўли борлигини ҳақида айтганини изоҳламаган. 25 август куни Путиннинг матбуот котиби Дмитрий Песков BBC'нинг сўровига жавобан Евгений Пригожиннинг ўлимида Кремлнинг алоқаси борлиги ҳақида хабарларни ёлғон деб атаганди.

Маълумот учун, «Вагнер» асосчиси Евгений Пригожин 23 август куни Твер осмонида содир бўлган авиаҳалокат натижасида ҳалок бўлганди.