Доналд Туск Полша бош вазири этиб сайланди

Полша парламенти кўпчилик овоз билан европапараст сиёсатчи Доналд Тускни мамлакатнинг навбатдаги бош вазири этиб сайлади ва унга республиканинг янги ҳукуматини шакллантириш вазифаси юкланди. 11 декабр, душанба куни бўлиб ўтган овоз беришда Сеймнинг 248 депутати Туск номзодини ёқлаб овоз берди, яна 201 нафар парламентарий эса қарши чиқди.

Аввалроқ Сейм консерватив «Қонун ва адолат» партиясидан амалдаги бош вазир Матеуш Моравецкийга ишонсизлик билдирган эди: 266 депутат унинг ваколатлари узайтирилишига қарши чиққан, 190 киши эса Моравецкийга овоз берган.

Туск 12 декабр куни парламентга ҳукумат дастурини тақдим этиши кутилмоқда, шундан сўнг унга ишонч вотуми берилади. Шундан кейин янги вазирлар маҳкамаси 13 декабр куни қасамёд келтириши мумкин, бу Тускка шу ҳафта охирида Брюсселда бўлиб ўтадиган ЕИ саммитида Полшанинг янги бош вазири сифатида қатнашиш имконини беради.

Сейм сайловларидан кейин Полшада ҳокимият учун кураш

Доналд Туск 2007-2014 йилларда Полша бош вазири бўлган ва 2014-2019 йилларда Европа кенгаши раиси лавозимида ишлаган. Унинг бош вазир лавозимига қайтиши 15 октябрда бўлиб ўтган сўнгги парламент сайловлари туфайли мумкин бўлди. Натижаларга кўра, «Қонун ва адолат» партияси кўпчилик овоз олиб, парламентдаги 460 ўриндан 194 тасини эгаллаган бўлса-да, ҳукуматни шакллантириш учун иттифоқчи топа олмади. Айни пайтда, мухолифатнинг учта партияси - Тускнинг «Фуқаролик платформаси», шунингдек, «Учинчи йўл» ва «Янги сўллар»дан иборат «Фуқаролик коалицияси» блоки парламентда 248 ўринга эга бўлди ва коалиция келишуви бўйича келишиб олди.

Полша президенти Анжей Дуда ноябр ойи охирида муваққат ҳукуматни қасамёдга келтирди ҳамда вазирлар маҳкамаси таркибини Дудага Матеуш Моравецкий тақдим этди. Бироқ, вақтинчалик ҳукуматнинг ишлаши учун Сейм овози керак эди, бу жараён эса охир-оқибат муваффақиятсизликка учради. Мухолифат Дудани янги вазирлар маҳкамасини шакллантириш жараёнини бир неча ҳафтага кечиктириш ниятида эканликда айблади.