Рақобатга алоқадор қонун лойиҳаси рад этилди
Қонунчилик палатаси рақобат тўғрисидаги қонун ҳужжатларига ўзгартишлар киритишни назарда тутувчи қонун лойиҳасини қайта кўриб чиқишга юборди. Лойиҳада имтиёзлар, субсидиялар ва бошқа турдаги давлат ёрдамлари бўйича ҳужжатлар лойиҳаларини Рақобат қўмитаси билан маслаҳатлашишни мажбурий қилиш, айрим санкцияларни юмшатиш таклиф этилганди.
Олий Мажлис Қонунчилик палатаси 12 декабр кунги йиғилишда рақобат тўғрисидаги қонун ҳужжатларига ўзгартишлар киритишни назарда тутувчи қонун лойиҳасини рад этди.
Қонун лойиҳасида рақобатга алоқадор бир қатор ўзгаришлар таклиф этилаётган эди.
Жумладан, лойиҳада нархлар асоссиз оширилган ёки тарифлар нотўғри қўлланган, тадбиркорлар ва истеъмолчиларнинг ҳуқуқ ва манфаатлари поймол қилинган тақдирда мазкур тадбиркорлик субъектларига нисбатан рақобат тўғрисидаги қонун ҳужжатлари талаблари қўлланиши назарда тутилганди.
Gazeta.uz'нинг ёзишича, қонуннинг 42-моддасига (Рақобат тўғрисидаги қонунчиликни бузганлик учун молиявий санкциялар) ўзгартириш киритиш кўзда тутилган эди. Бу модданинг амалдаги талқинига кўра, кичик иқтисодий оқибатларга олиб келадиган қонунбузарликлар (масалан, қўмитага маълумотларни тақдим этишдаги техник хатолар) учун тадбиркорга катта миқдордаги жарималар қўлланади. Шу сабабли, жазонинг мутаносиблиги тамойилидан келиб чиқиб, бундай ҳуқуқбузарликни биринчи марта содир этган тадбиркорга нисбатан молиявий санкцияни қўлламаслик таклиф этилмоқда — у билан фақат профилактик тушунтириш ишлари олиб борилади.
Бундан ташқари, қонуннинг 13-моддасига (Устун мавқе) ўзгартириш киритиш таклиф этилган. Унга кўра, асосий фаолияти табиий монополия шароитида товар ишлаб чиқариш ва (ёки) реализация қилиш бўлмаган хўжалик юритувчи субъект бундай фаолиятни амалга оширса, товар ёки монополия бозорида устун мавқе деб эътироф этилади (бу банд президентнинг 2023 йил 7 июлдаги қарорига ҳам киритилган).
Спикер Нурдинжон Исмоилов мазкур қонун лойиҳасини кун тартибидан олиб ташлашни, ҳужжатни якунлаш ва биринчи ўқишда қайта кўриб чиқиш учун Қонунчилик палатасининг Саноат, қурилиш ва савдо масалалари қўмитасига қайтаришни таклиф қилган. Муҳокамалардан сўнг қонун лойиҳаси кун тартибидан чиқарилган.
Мавзуга оид

14:25 / 15.04.2025
Ўзбекистонда эксклюзив ҳуқуққа эга компаниялар реестри эълон қилинди

12:21 / 17.03.2025
Шахсларни ўз розилигисиз фото ва видеога олиш тақиқланиши мумкин. Адлия вазирлиги қонун лойиҳасини муҳокамага чиқарди

19:08 / 12.03.2025
Қамоққа олинмаган гумонланувчиларнинг Ўзбекистондан чет элга чиқиши вақтинча чекланиши мумкин

18:23 / 26.08.2024