Mossack Fonseca асосчиси Рамон Фонсека Панамада вафот этди

Панамада «Панама ҳужжатлари» можаросининг марказида бўлган Mossack Fonseca юридик фирмаси асосчиси, ҳуқуқшунос Рамон Фонсека вафот этди. Бу ҳақда Панама Миллий адвокатлар ассоциацияси 9 май, пайшанба куни хабар берди.

Фонсеканинг адвокатига кўра, ҳуқуқшунос Панама касалхонасида пул ювиш иши бўйича ҳукмни кутаётган вақтда вафот этган. Ҳимоячининг сўзларига кўра, у 8 апрел куни бошланган суд мажлисида айнан соғлиғи билан боғлиқ муаммолар туфайли иштирок этмаган.

Прокуратура Рамон Фонсека, шунингдек, унинг собиқ бизнес шериги, германиялик Юрген Моссакни 12 йилга озодликдан маҳрум этишни талаб қилди.

2009 йилдан 2014 йилгача ҳокимиятда бўлган Панаманинг собиқ президенти Рикардо Мартинелли 71 ёшли Фонсеканинг ўлими муносабати билан у «шафқатсиз таъқиблар» қурбони бўлганини айтди. «Буюк инсон, ҳуқуқшунос, ёзувчи ва сиёсатчи», - деб ёзди у X ижтимоий тармоғида.

Пул ювиш иши бўйича ҳукм июн ойи бошидан кечиктирмай эълон қилиниши кутилмоқда.

«Панама ҳужжатлари»: юзлаб таниқли шахслар

2016 йилнинг апрел ойида дунёнинг бир қатор йирик оммавий ахборот воситалари офшор компанияларни рўйхатдан ўтказиш билан шуғулланган Панаманинг Mossack Fonseca юридик фирмаси ички ҳужжатлари таҳлили асосида суриштирувни эълон қилди. Ҳужжатларда сиёсатчилар, ишбилармонлар ва дунёнинг бошқа машҳур шахсларига шубҳали транзакциялардан ўнлаб миллиард доллар ишлаб олиш имконини берувчи компаниялар ҳақида маълумотлар бор эди. Умуман олганда, «Панама ҳужжатлари»га 140 та давлат раҳбарлари ва таниқли сиёсатчилар, шунингдек, 200 та давлатдан 240 минг офшор компаниялар киритилган. 

2019 йилда Германиянинг NDR, WDR ижтимоий-ҳуқуқий медиакомпаниялари ва Süddeutsche Zeitung газетаси олиб борган ҳисоб-китобларга кўра, «Панама ҳужжатлари»нинг эълон қилиниши натижасида юзага келган офшор можароси туфайли жами 1,07 миллиард евро жарима ва қўшимча солиқлар сифатида тўланган.

«Панама ҳужжатлари»нинг энг кўзга кўринган шахсларидан бири ўзини Россия президенти Владимир Путиннинг дўсти деб атаган виолончелчи Сергей Ролдугин эди. Эълон қилинган маълумотларга кўра, у шубҳали операцияларни амалга оширган бир неча миллиард долларлик айланмага эга учта офшор компанияга эгалик қилган.