Мадридда - каталониялик айирмачиларга амнистияга қарши намойишлар

Мадрид марказида Испания бош вазири Педро Санчес сиёсатига қарши норозилик намойиши бўлиб ўтди. 26 май, якшанба куни мухолифатдаги Алберто Нунес Фейхоонинг Халқ партияси (ХП) томонидан уюштирилган намойишда, расмий маълумотларга кўра, 20 мингга яқин киши қатнашган. Ташкилотчилар 80 минг иштирокчи ҳақида маълум қилди.

Мухолифат етакчиси айирмачиларни амнистия қилиш режаларидан воз кечишга чақирди

Тадбирда Испаниянинг собиқ бош вазирлари, Халқ партиясидан Мариано Рахой ва Хосе Мария Аснар иштирокида сўзга чиққан консерватив Фейхоо социалист Санчесни «суиистеъмоллик ва ҳаддан ошиб кетишда» айблаб, уни Каталония бўлгинчиларига нисбатан амнистия тўғрисидаги қонун лойиҳасини қайтариб олишга чақирди. Унинг сўзларига кўра, Санчес ҳукумати сиёсати туфайли «мамлакат боши берк кўчага кириб қолган». Мухолифатчининг таъкидлашича, Испания - «барча фуқаролар қонун олдида тенг бўлган ҳуқуқий давлат». 

«Испания жиноятлар ҳуқуқий оқибатларга олиб келишига кафолат бериши керак», деди Фейхоо. Намойишчилар Педро Санчеснинг ҳукумат раҳбари лавозимидан кетишини талаб қилишди.

Амнистия тўғрисидаги қонун лойиҳаси - Санчеснинг Каталония партияларига имтиёзи 

Испания парламентининг қуйи палатаси – Депутатлар конгрессида каталониялик айирмачиларни амнистия қилиш тўғрисидаги қонун лойиҳаси кўриб чиқилмоқда. У 30 май куни қуйи палата томонидан тасдиқланиши кутилмоқда. Ўнг қанот партиялар бу қонунга қарши. Қуйи палата уни март ойида аллақачон маъқуллаган, аммо ҳужжат Сенат томонидан қайта кўриб чиқиш учун қайтарилган, бу ерда ўнг партиялар кўпчиликни ташкил қилади. Агар у қабул қилинса, қарийб 400 киши амнистияга тушиши мумкин, жумладан, чет элда яшириниб юрган каталониялик сепаратистлар етакчиси Карлес Пучдемон ҳам. 

Испанияда бир неча ойдирки, Санчеснинг каталониялик бўлгинчиларни афв этиш режасига қарши намойишлар бўлиб ўтмоқда. 2023 йилда ўтган сўнгги парламент сайловларида иккинчи ўринни эгаллаган ва Халқ партиясидан консерваторларга етакчиликни бой берган Санчес бошчилигидаги Испания Социалистик ишчилар партияси Каталониянинг икки партияси билан 2017 йил Каталония мустақиллигини эълон қилишга бўлган муваффақиятсиз уринишда иштирок этган сиёсатчиларни амнистия қилиш бўйича келишувга эришди.

Муваффақиятсиз референдумдан сўнг Белгияга қочган Пучдемон май ойи ўрталарида 12 майдаги сайловлардан сўнг у ерда озчилик ҳукуматини бошқариш учун Барселонага қайтишни истаётганини эълон қилган эди.