БМТ Ўзбекистон ташаббуси билан ишлаб чиқилган резолюцияни маъқуллади 

4 июн куни БМТ Бош Ассамблеяси Ўзбекистон ташаббуси билан ишлаб чиқилган «Марказий Осиё давлатларининг гиёҳвандлик билан боғлиқ муаммоларни самарали ҳал этиш ва бартараф этиш учун ягона фронт бўлиб ҳаракат ва ҳамкорлик қилишга тайёрлиги» резолюциясини бир овоздан қабул қилди. Бу ҳақда Ташқи ишлар вазирлиги хабар берди. 

Резолюцияга 30 дан ортиқ давлат, жумладан, Арманистон, БАА, Баҳрайн, Беларус, Эрон, Индонезия, Иордания, Жазоир, Кувайт, Марокаш, Ўмон, Озарбойжон, Покистон, Қатар, Қирғизистон, Қозоғистон, Россия, Саудия Арабистони, Сенегал, Сингапур, Тожикистон, Туркия, Туркманистон, Хитой, Япония ва бошқалар ҳаммуаллифлик қилган. 

Резолюция концепцияси Ўзбекистон президентининг 2021 йил сентябр ойида БМТ Бош Ассамблеясининг 76-сессиясидаги нутқи асосида ишлаб чиқилган. 

Ҳужжатда Ўзбекистонда гиёҳвандлик ва наркожиноятларга қарши курашиш бўйича 2024-2028 йилларга мўлжалланган миллий стратегиянинг асосини ташкил этувчи концептуал қоидалар инобатга олинган. 

Қарорда таъкидланганидек, Марказий Осиёда Барқарор ривожланиш мақсадларига эришиш минтақада гиёҳванд моддалар савдоси ва гиёҳвандликка қарши кураш билан чамбарчас боғлиқ. 

Ҳужжатда гиёҳвандлик воситалари ва прекурсорларининг ноқонуний айланишига қарши курашиш бўйича комплекс чора-тадбирларни қабул қилиш, стратегик ташаббуслар ва чора-тадбирлар режаларини ишлаб чиқиш кўзда тутилган. Шунингдек, гиёҳванд моддалар билан боғлиқ муаммоларни ҳар томонлама ҳал этишда БМТ, халқаро молия институтлари ва бошқа манфаатдор тарафлар томонидан Марказий Осиё давлатларига кўмакни кенгайтириш муҳимлиги қайд этилган.