Бўрижарга чўкиб кетган талаба ўзбекча Википедия админи экани маълум қилинди

Аввалроқ, 2024 йил 19 июн куни Тошкент шаҳридаги Бўрижар каналига чўмилишга борган Жаҳон тиллари университети 3-босқич талабаси чўкиб, ҳалок бўлгани ҳақида хабар бергандик.

Маълум бўлишича, Сурхондарё вилояти Денов туманида туғилган 20 ёшли талаба Муҳаммадали Икрамов ўзбекча Википедиянинг фаол админларидан бири бўлган. Бу ҳақда ўзбекча Википедияга маълумот жойланган.

Унда ёзилишича, Муҳаммадали Икрамов 2022 йил 13 май куни инглизча Википедияда рўйхатдан ўтган ва қисқа вақт ичида унга маълумот жойлашни ўрганган.

Сўнг ўзбекча Википедияга маълумотлар киритиб, сифатли контентлар ярата бошлаган. У Викистипендия марафонининг биринчи мавсумида кучли ўнликка кирган.

“GIF қисқартмаси талаффузи“ мавзусида яхши мақола яратгани учун Ёшлар ишлари агентлиги томонидан махсус диплом ва 10 миллион сўм пул мукофоти билан тақдирланган.

Википедия қонун-қоидаларини яхши ўзлаштиргани, сифатли контент яратгани учун Икрамов ўзбекча Википедия фойдаланувчилари берган овозлар асосида 2023 йил 25 июн куни ўзбекча Википедия администратори ҳуқуқини олган.

У 2 йилда ўзбекча Википедияда қарийб 600 та мақола ва 5 мингдан зиёд саҳифа яратган, минглаб мақолани таҳрир қилган. Викимаълумотларда эса 3 мингга яқин таҳрир қилган. Умумий ҳисобда, Викимедиа жамғармаси лойиҳаларида 26 мингдан ошиқ таҳрирни амалга оширган.

“Ўзбек тилида сўзлашувчи викимедиачилар фойдаланувчи гуруҳи номидан Муҳаммадалининг оила аъзолари ва яқинларига ҳамдардлик билдирамиз. Ўзбек тили жонкуяри ўлароқ Википедияга қўшган салмоқли ҳиссаси лойиҳада абадий сақланади”, дейилади у ҳақдаги маълумотда.