Шолц: Германия бегуноҳ қамалган маҳбуслар учун курашишни давом эттиради

Германия ҳукумати Россия ва Беларусда сиёсий сабабларга кўра қамалганларнинг барчасини озод қилиш учун курашни давом эттиради. Бу ҳақда Германия канцлери Олаф Шолц 2 август, жумага ўтар кечаси Кёлн/Бонн аэропортида Россия Федерацияси ва Беларусда озод этилган сиёсий маҳбуслар билан Анқарадан учган самолёт қўнишидан бироз олдин журналистларга маълум қилди.

«Юқорида айтиб ўтилган алоҳида ҳолатларга қўшимча равишда, Германия ҳукумати Россия ва Беларус қамоқхоналарида адолатсиз равишда қамалган барча одамларни озод қилиш учун курашни давом эттиради, чунки улар сиёсий жиҳатдан фаол бўлганлар», - деди Шолц. 

Алмашинувни тайёрлашда АҚШ билан яқин ҳамкорлик

Россия томони билан сиёсий маҳбусларни озод қилиш бўйича музокаралар бир неча ой давом этди, деди Германия ҳукумати раҳбари. Шу билан бирга, Берлин «Россияда ноҳақ судланган сиёсий маҳбусларни озод қилиш ечимини излашда» Вашингтон билан яқиндан ҳамкорлик қилди.

Шолц 1 август куни кечқурун АҚШ президенти Жо Байденга қўнғироқ қилганини ва бу яқин ҳамкорлик учун унга миннатдорчилик билдирганини айтди. 

Чеченистонлик собиқ дала қўмондони Зелимхон Ханқошвилини ўлдирганликда айбланиб, Германияда умрбод қамоқ жазосига ҳукм қилинган Вадим Красиковни озод қилиш бўйича немис ҳукумати учун оғир қарор қабул қилинганини изоҳлар экан, канцлер шундай таъкидлади: «Умрбод қамоққа ҳукм қилинган қотилни экстрадиция қилиш қароридан ҳеч ким енгил тортмади. Жазони ижро этиш билан боғлиқ давлат манфаатлари Россияда бегуноҳ қамоққа олинган одамлар соғлиғи ва ҳаёти хавф остида қолганига алоқадор бўлиб чиқди».

Бошқа нарсалар қаторида, Германия канцлери Бундестагдаги мухолифат етакчисини (Христиан-демократик иттифоқ (ХДИ) раиси Фридрих Мерц) маҳбусларни алмашиш режалари ҳақида хабардор қилганини ва у бу режаларни маъқуллаганини таъкидлади. 

Маҳбуслар алмашинувида кимлар иштирок этди? 

ОАВ хабарига кўра, Россия алмашинув пайтида Ғарб давлатларига: сиёсатчилар Владимир Кара-Мурза ва Иля Яшин, ҳуқуқ ҳимоячиси Олег Орлов, жамоат арбоби Андрей Пивоваров, рассом Саша Скочиленко, мухолифатчи Алексей Навалнийнинг шериклари Лилия Чанишева, Ксения Фадеева ва Вадим Останин, Германия фуқароси Кевин Лик; журналист Иван Сафронов иши қатнашчиси, Россия ва Германия фуқаролигига эга сиёсатшунос Дитер Воронин, Германия ва Россия фуқароси Германа Мойжес, АҚШ фуқаролари Пол Уилан, Эван Гершкович, Алсу Курмашева, Германия фуқароси Патрик Шобелни топширди. Беларус ҳукумати ҳам ўлим жазосига ҳукм қилинган Германия фуқароси Рико Кригерни экстрадиция қилди. 

Россияга «Тиргартен қотили» Вадим Красиковдан ташқари, АҚШда компютерни бузиш ва фирибгарликда айбланиб 9 йилга қамалган Владислав Клюшин; Словенияда жосусликда айбланиб 1 йил 7 ойга қамалган Артем ва Анна Дулцевлар; Полшада Россия фойдасига жосусликда айбланган Павел Рубцов; Норвегияда Россия фойдасига жосусликда айбланган Михаил Микушин; Қўшма Штатларда киберфирибгарликда айбланиб 27 йил қамоқ жазосига ҳукм қилинган Роман Селезнев; АҚШда Россия ҳарбий-саноат комплекси учун технология ва Америка ўқ-дориларини контрабанда қилишда айбланган Вадим Коношченок қайтди.