20 дан ортиқ Россия компаниялари ЕИ санкциялари туфайли банкрот бўлиши мумкин

Йигирмадан ортиқ Россиянинг йирик саноат компаниялари Россия Федерацияси саноат вазири Антон Алихоновга ўз маҳсулотларини ишлаб чиқариш учун хомашё етишмаслиги масаласини ҳал қилиш илтимоси билан хат юборди. Йирик корхоналар акс ҳолда банкротлик ва ишлаб чиқаришнинг тўлиқ тўхтаб қолишига дуч келишларини билдирди, деб хабар берди мактуб мазмуни билан таниш бўлган РБК нашри 22 август, пайшанба куни. Саноат ва савдо вазирлигига мурожаат қилганлар орасида «Техноникол», «Беко», «Вератек», «РусТА», «Верахим» компаниялари бор.

Гап полиуретан кўпиклари, пломбалари, қувурлар, музлатгич компонентлари ва автомобил қисмлари ишлаб чиқаришда қўлланадиган полиметилен фенил изоцианатлар ("МДИ") ҳақида кетмоқда. "МДИ" Россияда ишлаб чиқарилмайди ва Европа Иттифоқи Россия Федерациясига қарши санкцияларнинг 14-пакетини киритганидан сўнг, уларни импорт қилиш имконияти кескин камайди, жумладан, дўст деб аталадиган давлатлар - Хитой ва Саудия Арабистонидан.

Хатда, шунингдек, материалларнинг жорий таъминоти фақат икки ой давом этиши айтилади. Ишлаб чиқарувчилар Алихоновдан Арабистоннинг Sadara Chemical компанияси билан "МДИ" етказиб бериш бўйича музокаралар олиб боришда ёрдам беришни, ташқи савдо операциялари учун Хитой банкларида материаллар учун тўловларни амалга ошириш билан боғлиқ муаммоларни ҳал қилиш ва Россия Федерациясида тўғридан тўғри "МДИ" ишлаб чиқаришни йўлга қўйишда ёрдам беришни сўради.

ЕИнинг Россияга қарши санкциялари 14-пакети

Россиянинг Украинага қарши давом этаётган ҳарбий ҳужумига жавобан Россия Федерациясига қарши 14-санкция пакети 24 июн куни Европа Иттифоқи томонидан ниҳоят тасдиқланди. У, хусусан, Россиянинг суюлтирилган газ саноатига қарши чоралар ва Европа компанияларининг учинчи мамлакатлардаги шуъба корхоналари томонидан санкцияларни четлаб ўтишни ўз ичига олади. Россия Федерациясининг 116 жисмоний ва юридик шахслари ҳам чекловларга дуч келди.

«Россия SWIFT'и» деб аталадиган тизим ҳам санкцияларга дучор бўлди: Марказий банк томонидан яратилган молиявий хабарларни узатиш тизими ("СПФС"), у орқали Россия билан баъзи операциялар амалга оширилганди. Марказий банк маълумотларига кўра, йил бошида "СПФС" 556 рус ва хорижий фойдаланувчиларга эга эди. Улардан 159 таси 20 та хорижий давлатдан, шу жумладан 58 таси банкдир. Bloomberg хабар беришича, улар орасида Хитой, Беларус, Арманистон, Тожикистон ва Қозоғистон банклари бор.