Олаф Шолц Владимир Кара-Мурза билан учрашди

Германия канцлери Олаф Шолц Берлинда бир ой олдин қамоқдан озод этилган россиялик мухолифатчи сиёсатчи ва публицист Владимир Кара-Мурзани қабул қилди. Германия ҳукумати раҳбари бу ҳақда 3 сентябр, сешанба куни X ижтимоий тармоғида маълум қилди ҳамда Кара-Мурзанинг кучи ва жасорати, «Россиянинг демократик келажагига қўшган ҳиссаси»га қойил қолганини билдирди.

«Август ойида биз уни маҳбуслар алмашинувида озод қилдик ва бугун бир-биримиз билан кўпроқ гаплашиш имконига эга бўлдик», дея қўшимча қилди Шолц.

Владимир Кара-Мурза Германия канцлери билан суҳбатини «муҳим, батафсил ва самимий» деб атади. Унинг сўзларига кўра, мулоқот «Украина, Россия, умумий Европа», шунингдек, «Россия ва Беларус қамоқхоналаридан чиқарилиши керак бўлган сиёсий маҳбуслар ҳақида» бўлган.

Август ойи ўрталарида Владимир Кара-Мурза ва унинг оиласи Оқ уйда АҚШ президенти Жо Байден томонидан қабул қилинган эди.

2023 йил апрелида Россия томонидан Украинага қарши бошланган урушни танқид қилгани учун мухолифатчи «давлатга хиёнат», «номақбул ташкилот билан ҳамкорлик қилиш» ва армия ҳақидаги «фейклар» моддалари билан 25 йилга қаттиқ режимли колонияга ҳукм қилинган. 2024 йил 1 августда у Россия, Беларус ва Ғарб давлатлари ўртасидаги кенг кўламли маҳбуслар алмашинуви доирасида озод қилинди.