«Биз кетмаймиз» - Маҳмуд Аббос БМТ минбаридан Исроилнинг ҳаракатларини қоралади

Фаластин президенти Маҳмуд Аббос 26 сентябр куни Ню-Йоркда БМТ Бош Ассамблеясида дунё етакчиларига мурожаат қилиб, Фаластин халқи ўз ватанини, аждодлари заминини ташлаб кетмаслигини таъкидлади. У Исроилни Ғазо секторидаги урушини қоралаб, халқаро ҳамжамиятни «геноцид»ни тўхтатишга чақирди, шунингдек, урушдан кейинги анклав ҳолати бўйича ўз режасини тақдим этди.

Маҳмуд Аббос нутқини «Биз кетмаймиз» иборасини уч марта такрорлаш билан бошлади. У Исроилни Ғазони вайрон қилиб, яшаш учун яроқсиз қилиб қўйганликда айблади.

«Фаластин — ватанимиз, ота-боболаримиз замини. У бизники бўлиб қолади, агар кимдир кетиши керак бўлса, бу ўзбошимча босқинчилар бўлади», деди Аббос.

Фаластин раҳбари Исроил Бош вазири Бинямин Нетаняҳунинг армияси Ғазода тинч аҳолини ўлдирмаяпти, деган даъвосини рад этди.

«Сиздан сўрайман, у ҳолда 15 мингдан ортиқ болани ким ўлдирган?», деди Аббос.

У Ғазо секторидаги уруш ва геноцидни тўхтатишга, Исроилга қурол юборишни тўхтатишга чақирди.

«Халқимиз билан содир бўлаётган воқеалар учун бутун дунё жавобгар», деб таъкидлади Фаластин президенти.

Маҳмуд Аббос ўз нутқида исроиллик кўчманчилар зўравонлиги ва турар-жой кенгайишига тўхталиб, Ғарбий Соҳилнинг Исроил тажовузига мунтазам дучор бўлаётганини қайд этди.

«Шафқатсиз кўчманчилик фаолияти кузатиляпти. Улар бутун Фаластин бўйлаб уй қурмоқда, гўё Фаластин уларникидек», деди у.

У Исроилни Маъбад тоғидаги статус-квони бузганликда айблаб, «Исроил террорчи вазири» Ал-Ақсо масжидида ибодатхона қуришга чақирганини даъво қилди. Афтидан у ўта ўнг қарашлари билан танилган Исроил миллий хавфсизлик вазири Итамар Бен-Гвирни назарда тутди.

Маҳмуд Аббос баланд минбардан туриб, Байден маъмуриятини Ғазо секторидаги урушда Исроилни қўллаб-қувватлаётгани учун ҳам танқид қилди. Унинг айтишича, Қўшма Штатлар Фаластин давлатининг БМТ тўлиқ аъзоси бўлишига қарши овоз берган Хавфсизлик Кенгашининг ягона аъзосидир.

Фаластин раҳбари турли резолюцияларни бузгани учун Исроилни БМТ аъзолигидан чиқариб юборишни талаб қилишини айтди.

Президент Маҳмуд Аббос фурсатдан фойдаланиб, Фаластин даъвосини қўллаб-қувватлаб намойишга чиққан бутун дунё халқига миннатдорлик билдирди. У глобал жамоатчилик фикрининг Фаластин даъвоси фойдасига ўзгарганини таъкидлади ва ўз ёрдамини таклиф қилаётганларга, жумладан, Фаластин давлатини тан олган давлатларга миннатдорлик билдирди.

Аббос ўз нутқи давомида Ғазо секторини урушдан кейинги бошқарув бўйича ўзининг 12 банддан иборат қарашларини баён қилиб, халқаро ҳамжамиятдан фикр ва мулоҳазалар сўради.

Режанинг биринчи банди Ғазо секторида доимий ўт очишни тўхтатиш ва исроиллик кўчманчиларнинг Ғарбий Соҳилда фаластинликларга қарши ҳужумларини тўхтатишни назарда тутади.

Иккинчи нуқта, инсонпарварлик ёрдами Ғазо бўйлаб оммавий равишда етказилишини талаб қилади.

Учинчидан, Исроил ҳеч қандай буфер зоналар яратмаган ҳолда Ғазо секторидан ўз қўшинларини бутунлай олиб чиқиб кетиши ва кўчирилган фаластинликларнинг ўз уйларига, ҳеч бўлмаганда урушдан олдин яшаган вайрон бўлган шаҳарларига қайтишига имкон бериши керак. Аббос фаластинликларни Миср ва Иорданияга эвакуация қилиш режаларини қатъиян рад этди.

Тўртинчидан, БМТ Фаластинлик қочқинлар бўйича агентлиги UNRWA ҳимоя қилиниши ва фаолияти давом эттирилишига рухсат берилиши кераклигини таъкидлади.

Бешинчи бандда Аббос босиб олинган ерларида фаластинликларни халқаро ҳимоя қилишга чақирди. «Биз Исроил билан урушмаяпмиз. Биз Исроилга қарши кураша олмаймиз ва жанг қилмоқчи эмасмиз, лекин ҳимояга муҳтожмиз».

Олтинчидан, Фаластин ҳукумати бутун Ғазо сектори, жумладан, Рафаҳ чегара пункти ва бошқа ўтиш пунктлари устидан юрисдикцияга эга бўлиши керак.

Еттинчидан, Фаластин маъмурияти «кенг қамровли миллий ислоҳотлар жараёнида» иштирок этиш бўйича саъй-ҳаракатларини давом эттиради. Аббоснинг айтишича, Рамаллаҳнинг бу борадаги фаолияти дунё мамлакатлари томонидан юқори баҳоланган ва бу Ғазонинг уруш пайтида вайрон бўлган инфратузилмасини қайта тиклаш учун муҳим аҳамиятга эга бўлади.

Саккизинчи бандда Фаластин ҳукумати Ғазо сектори, Ғарбий Соҳил ва Шарқий Қуддусдаги фаластинликлар учун ягона вакиллик органи бўлишини ва барча бу ҳудудларда ҳокимиятга эга бўлишини назарда тутади.

«Биз кўп нарса сўрамаймиз, лекин камроғини ҳам қабул қилмаймиз», деди Аббос ва агар Исроил Шарқий Қуддусда овоз бериш учун рухсат берса, миллий сайловларни ўтказишга тайёрлигини қўшимча қилди.

Тўққизинчидан, фаластинликлар БМТ тўлақонли аъзоси мақомини олиш йўлидаги саъй-ҳаракатларини давом эттиради ва Аббос халқаро ҳамжамиятни бу ташаббусни қўллаб-қувватлашга чақиради.

Ўнинчидан, икки давлат тузиш ҳақидаги қарорни амалга ошириш учун Исроилга Ғарбий Соҳил, Ғазо сектори ва Шарқий Қуддусдан бир йил ичида чиқиб кетишни буюрган БМТ Бош Ассамблеяси резолюцияси тўлиқ амалга оширилиши керак.

Ўн биринчи бандда икки давлат қарашларини амалга ошириш учун бир йил ичида халқаро тинчлик конференцияси ўтказиш таклиф этилди.

Ўн иккинчи - иккала янги давлат аҳолисини ҳимоя қилиш учун халқаро тинчликпарвар кучларни яратиш.

Якунда президент Маҳмуд Аббос Исроилни ўзини Ғазо секторига боришига рухсат беришга мажбурловчи резолюцияни қабул қилишга чақирди.

Аббос ўтган ой Туркия парламентида қилган чиқишида урушдан вайрон бўлган Фаластин анклавига бориш ниятини маълум қилган эди. Шу вақтдан бери Исроил расмийлари унга анклавга киришни тақиқлаётганини даъво қилди.

«Фаластин озод бўлади. Бунга эътироз билдирганларга қарамай, барибир озод бўлади», деб якунлади Аббос БМТ Бош Ассамблеясидаги нутқини.