Samsung учга букланадиган смартфонни ёзда чиқаради

Январь ойида Samsung компанияси учга букланадиган дисплейли телефон ишлаб чиқаётганини расман эълон қилган эди. Жанубий Корея технологик гиганти ҳали тафсилотларни ошкор қилмаган бўлса-да, сизиб чиққан маълумотлар баъзи нарсаларни тасаввур қилишимизга имкон беради.

Нуфузли инсайдер Росс Янг сўзларига кўра, бу 6,49 дюймли экран бўлади. Бироқ тўлиқ очилганда қурилма 10 дюймли экранга эга тўлақонли планшетга айланади.

Қизиғи шундаки: аккордеон каби букланадиган ва экраннинг бир қисмини очиқ қолдирадиган Huawei компаниясининг Mate XT смартфонидан фарқли ўлароқ, Samsung компанияси G услубидаги буклама механизмдан фойдаланади, бу эса қурилмада очиқ жой қолдирмайди. Ушбу ёндашув смартфоннинг чидамлилигини таъминлаши мумкин.

Янг сўзларига кўра, компания бундай қурилма учун махсус ҳимоя плёнкасининг янги турини ҳам ишлаб чиқмоқда.

Учга букланадиган телефонни ишлаб чиқариш билан боғлиқ қийинчиликларни ҳисобга олган ҳолда, ишлаб чиқариш ҳажми чекланган бўлиши кутилмоқда. Смартфон оммавий бозор флагмани сифатида эмас, балки экспериментал премиум модел сифатида тақдим этилиши мумкин.

Бундай смартфон қанча туриши номаълум. Бир нарса аниқ - бу арзон бўлмайди. Huawei Mate XT Хитойда қарийб 3 минг долларга сотиляпти, Samsung «учбукламаси» худди шундай нарх атрофида бўлишини кутишимиз мумкин.

Сизиб чиққан маълумотларга кўра, қурилма 2025 йил 3-чорагида (июлдан сентябргача) чиқарилади ва Samsung компаниясининг бошқа букланадиган моделлари, хусусан, Galaxy Z Fold 7 ва Z Flip 7, шунингдек, янада арзонроқ Galaxy Z Flip 7 FE қаторидан жой олади.