Путин ФСБдан хорижда назоратни кучайтиришни талаб қилди

Россия президенти Владимир Путин Федерал хавфсизлик хизматидан давлат чегараси устидан назоратни кучайтиришни талаб қилди. «Давлат чегарасини қўриқлаш бўйича жиддий қўшимча чора-тадбирлар кўриш керак. Потенциал хавфли ҳудудларда чегара зичлигини оширишда давом этишимиз керак», — деди у 27 феврал, пайшанба куни ФСБ ҳайъатининг кенгайтирилган йиғилишида сўзлаган нутқида. Унга кўра, мамлакатнинг чегарадош районлари аҳолисининг хавфсизлиги ҳам таъминланиши керак.

Россия Мудофаа вазирлиги Курск областида учта қишлоқ эгалланганини хабар қилди

Путиннинг Россия чегарасини мустаҳкамлаш ҳақидаги сўзлари Россия армиясининг Украина Қуролли кучларини Курск областидан деярли етти ойдан бери чиқариб юборишга уринишлари фонида янграган. У 2024 йил 6 августда Россия области ҳудудига кириб келган ва ҳозиргача Суджа район маркази ва унинг атрофидаги ҳудудларни ўз назорати остида ушлаб турибди.

Айни пайтда Россия Мудофаа вазирлиги кетма-кет иккинчи кун россиялик қўшинлар Курск областидаги аҳоли пунктларини эгаллаб олгани ҳақида хабар бермоқда. Пайшанба куни у Шимолий ҳарбий гуруҳ бўлинмалари Николский қишлоғини назоратга олганини маълум қилди. Бир кун аввал Орловка ва Погребки қишлоқлари эгаллангани хабар қилинган эди.

Погребкида рус қўшинларининг олға силжиши Украинанинг DeepState лойиҳаси томонидан ҳам тан олинган. Қишлоқ учун кураш бир неча ой давом этди. Эълон қилинган видеотасвирлардан кўриниб турибдики, Россия ҳарбийлари қишлоқнинг камида марказий қисмини назорат қилмоқда.