Мактабларда смартфонларни тақиқлашнинг ўзи етарли эмас – тадқиқот

Халқаро тадқиқот натижаларига кўра, мактабларда смартфонлардан фойдаланишни шунчаки тақиқлаш кутилган ижобий натижа бермайди. 11 давлат вакилларидан иборат олимлар бундай чеклов чоралари ўсмирларнинг соғлиғини, уйқу сифатини, ўқув фаолиятини ва дарс пайтидаги хатти-ҳаракатларини яхшиламайди, деган хулосага келди.

Бунинг ўрнига тадқиқотчилар болалар, ота-оналар ва ўқитувчилар учун замонавий технологиялардан самарали фойдаланиш бўйича таълим дастурларини ўз ичига олган комплекс ёндашувни тавсия қилмоқда.

Тадқиқот Англияда смартфонлардан фойдаланишни чеклаш бўйича мактаб сиёсати самарадорлиги баҳоланганидан сўнг бошланди. Натижалар шуни кўрсатдики, чекловчи чоралар нафақат мавжуд муаммоларни бартараф эта олмайди, балки баъзи ҳолларда болаларда вақтни бошқариш ва диққатни жамлаш кўникмаларини ривожлантиришга тўсқинлик қилади. Олимларнинг таъкидлашича, замонавий технологиялар кундалик ҳаётнинг ажралмас қисмига айланган ва уларни шунчаки чиқариб ташлаш конструктив ечим эмас.

Мутахассислар мактабларда «рақамли гигиена» дарсларини жорий этишни таклиф қилмоқда, бунда болаларга ётишдан олдин гаджетлардан фойдаланишдан воз кечиш ёки интернетдаги маълумотларни танқидий баҳолаш каби амалий кўникмалар ўргатилади. Олимлар ота-оналарни ҳам қўллаб-қувватлаш зарурлигига алоҳида эътибор беришади, уларнинг кўпчилиги ўз фарзандлари билан гаджетлар ҳақида суҳбатлашишни билмайди.