Девид Бэкҳемга рицарлик унвони берилади

Футбол бўйича Англия терма жамоасининг собиқ футболчиси Девид Бэкҳем кейинги ҳафта рицарлик унвони билан мукофотланади, деб хабар берди BBC Sport.

Бэкҳемнинг исми Буюк Британия қироли Чарлз III нинг расмий туғилган куни муносабати билан июн ойи ўрталарида эълон қилинадиган мукофотланадиганлар рўйхатига киритилади (одатда у ҳақиқий туғилган кун санасига мос келмайди).

Шундай қилиб, Бэкҳем сэр унвонини, унинг рафиқаси, Spice Girls гуруҳининг собиқ аъзоси Виктория эса леди унвонини қабул қилади.

The Guardian’нинг ёзишича, Девид ва Виктория Бэкҳем бир неча бор тадбирларда қироллик оиласи аъзолари билан бирга кўриниш берган. Охирги марта бу май ойида, Челсидаги гуллар кўргазмасида содир бўлган. Февралда Бэкҳем Чарлз III нинг Ҳайгроувдаги қароргоҳида Англия—Италия муносабатларини ривожлантиришга бағишланган кечки овқатга таклиф қилинган эди.

Девид Бэкҳем «Манчестер Юнайтед», «Реал», «Милан», ПСЖ, «Лос-Анжелес Гелакси» жамоаларида тўп сурган. «Юнайтед» таркибида у олти маротаба Англия Премьер-лигасини, 1999 йилда эса Чемпионлар лигасини ютган. Англия терма жамоаси таркибида 115 та ўйин ўтказган ва 17 та гол урган. Айни вақтда Бэкҳем Лионел Месси ўйнаётган Американинг «Интер Майами» футбол клуби эгаларидан бири ҳисобланади.