Automechanika Tashkent 2025: автоэкспертлар тажриба майдони

Тадбир Ўзбекистон ва Марказий Осиё минтақасида автомобил бизнесининг ҳозирги ҳолати ва ривожланиш истиқболларини муҳокама қилиш учун автомобилсозлик саноатининг етакчи вакиллари, таҳлилчилар ва амалиётчиларни бирлаштирди. Ишлаб чиқаришни маҳаллийлаштириш, дилерлик тармоқларини ривожлантириш, сотувдан кейинги хизмат кўрсатиш бозорини трансформация қилиш ва янги технологик тенденцияларга мослаштириш масалалари диққат марказида бўлди.

Экспертлар панелида Ўзбекистон автомобил бизнеси уюшмаси (ABA Uzbekistan) раиси Ш.Ф. Юсупов, Қозоғистон автомобил бизнеси уюшмаси (AKAB) таҳлилий бўлими раҳбари И.В. Шевченко, дилерлик тармоғини ривожлантириш бўйича директор А.В. Истомин, ADM Global компаниялар гуруҳи тижорат директори А.В. Куренков ва DAS AUTO мулкдори ва бошқарувчиси К.О. Нагиев иштирок этди.

ABA Uzbekistan раиси Шуҳрат Фаттоҳович Юсупов ўз нутқида мамлакат автомобил бозори трансформациянинг муҳим босқичини бошдан кечираётганини, ўсиш суръатлари бизнесга ёндашувлар ва мижозлар билан ўзаро муносабатларда тизимли ўзгаришлар зарурати билан уйғунлашганини таъкидлади.

“Бугунги кунда автомобилларни шунчаки ишлаб чиқариш эмас, балки улар атрофида тўлақонли экотизимни барпо этиш – бутловчи қисмларни маҳаллийлаштириш ва хизмат кўрсатиш инфратузилмасини ривожлантиришдан тортиб, замонавий технологияларни жорий этиш ва хизмат кўрсатишнинг янги маданиятини шакллантиришгача муҳимдир. Автомобил бизнеси кенгроқ иқтисодий тизимнинг бир қисмига айланмоқда ва ундаги муваффақият ишлаб чиқарувчилар, дистрибюторлар ва давлатнинг саъй-ҳаракатларини бирлаштириш қобилиятига бевосита боғлиқ.

Биз соҳада рақобатнинг жўшқин ўсишини кузатмоқдамиз. Агар илгари Ўзбекистонда фақат иккита ишлаб чиқарувчи – UzAuto ва SamAuto битта тузилмага кирган бўлса, бугунги кунда уларнинг сони олтитага етди. Булар — UzAuto Motors, ADM Jizzakh, Asaka Motors International, BYD Uzbekistan Factory, Jizzakh Automobile Plant ва SAZ.

Бозордаги рақобат, менимча, соҳа ривожланишининг асосий драйвери ҳисобланади”, – деди Шуҳрат Юсупов.

Экспертлар бозорни ривожлантириш истиқболлари юзасидан фикр алмашди, соҳа олдида турган муаммолар ва ҳудудлараро ҳамкорликни мустаҳкамлаш йўлларини муҳокама қилди. Панел турли мамлакатлардаги автомобил бизнеси иштирокчилари ўртасида очиқ профессионал мулоқот ва тажриба алмашиш майдонига айланди.

Алексей Куренков қуйидагиларни маълум қилди:

“Агар 2022 йилда бозорда атиги саккизта расмий дистрибютор бўлган бўлса, 2025 йилга келиб улар 23 тага етди — бу уч йил ичида деярли уч баробар ўсишдир. Бу хавотирга сабаб эмас, балки бозорнинг етилиш даражаси ва жозибадорлигидан далолатдир. Рақобат бизни кучлироқ қилади, мижозга яқинроқ бўлишга ва хизмат кўрсатишни расмиятчиликдан фалсафага айлантиришга ундайди. Бугунги кунда ўз истеъмолчисини чинакамига тинглайдиган компания ютуққа эришади”.

Тадбир Ўзбекистон автомобил бизнеси уюшмаси (ABA Uzbekistan) — бозорнинг асосий иштирокчиларини бирлаштирувчи ва автомобил саноатини ривожлантириш, хизмат кўрсатиш стандартларини ошириш ҳамда тармоқ ичидаги ишбилармонлик алоқаларини мустаҳкамлашга кўмаклашувчи мустақил нотижорат ташкилот томонидан ташкил этилди.

Ўтказилган панел бозор иштирокчиларининг очиқлик, ҳамжиҳатликда ривожланиш ва Ўзбекистоннинг Марказий Осиёдаги автомобил бизнеси марказларидан бири сифатидаги мавқейини мустаҳкамлашга ҳисса қўшадиган узоқ муддатли шериклик муносабатларини ўрнатишга бўлган интилишининг яна бир тасдиғи бўлди.

  Реклама ҳуқуқи асосида