Трамп Си Жинпинг билан бўлажак учрашув тафсилотлари билан ўртоқлашди

АҚШ президенти Доналд Трамп Хитой раиси Си Жинпинг билан яқинда бўлиб ўтадиган учрашувни кутаётганини маълум қилди, деб хабар берди NBC News.

Бу ҳақда у 29 октябрь куни Жанубий Корея президенти Ли Чжэ Мён томонидан Кёнжудаги Осиё-Тинч океани иқтисодий ҳамкорлиги саммити доирасида ташкил этилган кечки овқат пайтида маълум қилди.

«Мен эртага эрталаб раис Си Жинпинг билан учрашаман. Бу уч соат, уч-тўрт соат бўлиши мумкин», деди Америка етакчиси.

Шу билан бирга, Хитой учрашув арафасида Вашингтон билан ҳамкорлик қилишга тайёрлигини маълум қилди.

Хитой Ташқи ишлар вазирлиги бўлажак тадбирга изоҳ бериб, Пекиннинг конструктив муносабатини таъкидлади.

Давлат раҳбарлари даражасидаги дипломатия Хитой-Америка муносабатларида «алмаштириб бўлмайдиган стратегик йўналтирувчи рол» ўйнайди, деди Хитой Ташқи ишлар вазирлиги расмий вакили Го Цзякун Пекинда бўлиб ўтган брифингда.

Унинг сўзларига кўра, Трамп ва Си Жинпинг «Хитой ва АҚШ ўртасидаги муносабатлар учун муҳим бўлган стратегик ва узоқ муддатли масалаларни, шунингдек, томонларни қизиқтирган асосий мавзуларни чуқур муҳокама қилади».

«Биз ушбу учрашувнинг ижобий натижаларига эришиш, Хитой-Америка муносабатларини барқарор ривожлантириш учун янги йўналишларни белгилаш ва уларга янги туртки бериш учун Америка томони билан биргаликда ишлашга тайёрмиз», деб қўшимча қилди у.

Эслатиб ўтамиз, Хитой ва АҚШ Си Жинпинг ва Трамп учрашувидан олдин савдо келишувининг «рамкалари» ҳақида келишиб олган эди. Бу ҳақда аввалроқ ҳар икки томон расмийлари маълум қилганди.

Дунёнинг икки йирик иқтисодиёти ўртасида юқори кескинлик ҳамон сақланиб қолмоқда. Яқинда Пекин илғор технологиялар учун зарур бўлган нодир металлар экспортига қатъийроқ чекловлар жорий этишга қарор қилди. Бунга жавобан Трамп Хитой импортига қўшимча божлар жорий этиш билан таҳдид қилди.