Россия Суми вилоятига ҳужум қилди: бир киши ҳалок бўлди, яраланганлар бор

3 ноябрга ўтар кечаси Россия қўшинлари ҳужумкор учувчисиз аппаратлар билан Суми вилоятига ҳужум қилди. Вилоят ҳарбий маъмурияти (ВҲМ) раҳбари Олег Григоров маълум қилишича, Тростянец жамоати ҳужум остида қолган. «Россияликлар одамларни кечаси, улар ухлаётган пайтда нишонга олди», — деб ёзди у Telegram’да.

Фото: Олег Григоров

Дастлабки маълумотларга кўра, бир киши ҳалок бўлган. Қутқарувчилар вайроналар остидан яна уч кишини чиқариб олди, уларга зарур тиббий ёрдам кўрсатилмоқда.

Ҳужум жойида қидирув-қутқарув ишлари давом этмоқда, бошқа оқибатлар аниқланмоқда, дея қўшимча қилди Григоров.

2 ноябр кечқурун Россия қўшинлари Суми вилоятининг Лебедин жамоатига қарашли қишлоққа ракета зарбаси берган. Ҳужум натижасида 55 ва 65 ёшли икки аёл яраланди, турар жой секторига шикаст етди.

Ўтган тун Shahed туридаги Россия дронлари ҳужумидан Миколайив вилояти ҳам жабр кўрди, деб хабар берди ВҲМ раҳбари Виталий Ким. Энергетика инфратузилмасига шикаст етгани қайд этилди. «12 та аҳоли пунктида электр ўчди, ҳозирча барча истеъмолчилар электр энергияси билан таъминланди. Жабрланувчилар йўқ», — деб ёзди у.

Миколайив шаҳрида дрон ҳужумлари оқибатида маиший-хўжалик моллари супермаркетида ёнғин чиққан, у тонгга қадар ўчирилгани қўшимча қилинди. Бундан ташқари, корхоналардан бири ҳудудидаги бинолар, иккита автомобил ва кўп қаватли уйнинг ойналарига зарар етди. Жабрланганлар йўқ.

https://www.dw.com/ru/rossia-atakovala-sumskuu-oblast-est-zertva-i-postradavsie/a-74592588

Тайёрлаган: Отабек Матназаров

#Россия #Украина #Суми