Метро‌да китобхонлар учун “Турон китоб бекати” ташкил қилинди

Тадбир "Алишер Навоий" ва "Пахтакор" метро бекатларининг ўтиш қисмида ўрнатилган китоб жавонлари ёнида ташкил этилди. Унда Республика Маънавият ва маърифат маркази раҳбари Отабек Хасанов, “Туронбанк” АТБ бошқарув раиси Чори Мирзаев, Транспорт вазирлиги ва Тошкент метрополитени масъуллари, Ўзбекистонда хизмат кўрсатган маданият ходимлари, Ёзувчилар уюшмаси раиси Сирожиддин Саййид, журналист Шерзодхон Қудратхўжа, шунингдек, шоирлар ва фаол китобхонлар иштирок этди.

Лойиҳа аҳоли, айниқса ёшлар ўртасида китобхонлик маданиятини ошириш ва ўқишга бўлган қизиқишни кучайтириш мақсадида амалга оширилмоқда. “Турон китоб бекати” жавонларидаги асарлар “Ишонч асосидаги китоб алмашинуви” тамойилига асосланади: йўловчи китобни олиб, манзилига етгунча ўқийди ва уни бошқа бекатдаги жавонга қайтариб қўяди. Шу орқали метро йўловчилари ўртасида ўқиш, фикрлаш ва билим алмашиш маданияти шаклланади.

Тадбирда сўз олган “Туронбанк” АТБ бошқарув раиси Чори Мирзаев ушбу ташаббуснинг мақсадини қуйидагича изоҳлади: “Банк фақат молиявий хизмат кўрсатувчи муассаса эмас, балки жамиятда маданий ва маънавий қадриятларни ривожлантирувчи кучли ижтимоий платформадир. ‘Турон китоб бекати’ орқали биз ҳар бир йўловчини ўқишга ундайдиган, фикрлашга чорлайдиган, маънавий бойлик улашадиган муҳит яратмоқдамиз”. 

“Турон китоб бекати” лойиҳаси орқали Туронбанк ўзининг ижтимоий масъулиятли ташаббусларини давом эттириб, маданий-маънавий қадриятларни қўллаб-қувватлаш йўлида янги босқични бошлаб бермоқда.

Реклама ҳуқуқи асосида