Давлат ижтимоий суғуртаси: нафақаларни тайинлаш ва тўлаш тартиби тасдиқланди

Ҳукумат қарори билан “Давлат ижтимоий суғуртаси доирасида вақтинча меҳнатга лаёқатсизлик ҳамда ҳомиладорлик ва туғиш нафақаларини тайинлаш ҳамда тўлаш тартиби тўғрисида”ги низом тасдиқланди. Низом суғурта ҳодисалари юзага келганда суғурталанган шахсларга тўловларни тайинлаш ва тўлаш механизмларини белгилайди.

Низомга кўра, суғурта ҳодисалари бўйича тўловлар босқичма-босқич жорий этилади. Хусусан, 2026 йил 1 январдан ҳомиладорлик ва туғиш нафақаси, 2026 йил 1 июлдан эса вақтинча меҳнатга лаёқатсизлик нафақаси тўланади.

Ҳужжатда тўловларни олиш ҳуқуқи қайси даврларда юзага келиши аниқлаштирилган. Жумладан, суғурталанган шахс иш берувчи билан меҳнат муносабатларида бўлган пайтда, фуқаролик-ҳуқуқий хусусиятга эга шартномалар асосида хизмат кўрсатаётган даврда ёки қонунчиликда белгиланган тартибда бошқа расмий фаолият билан банд бўлган вақтида суғурта ҳодисаси рўй берса, тўловлар тайинланиши мумкин.

Низомда суғурта стажи бўйича ҳам талаблар белгиланган. Ҳомиладорлик ва туғиш нафақасини олиш учун камида 10 ой, вақтинча меҳнатга лаёқатсизлик нафақасини олиш учун камида 6 ой суғурта стажи мавжуд бўлиши шарт.

Қайд этилишича, вақтинча меҳнатга лаёқатсизлик нафақаси меҳнатга лаёқатсизлик варақасида кўрсатилган барча давр учун тўланади, бироқ 1 календар йилда 182 календар кундан ошмаган қисми учун амалга оширилади.

Шунингдек, ҳомиладорлик ва туғиш нафақаси миқдорини ҳисоблашда суғурта стажига мутаносиб равишда ўртача ойлик иш ҳақига стаж коэффициенти қўлланади: 10–24 ой учун 75 фоиз, 25–60 ой учун 85 фоиз, 61 ой ва ундан ортиқ суғурта стажи учун 100 фоиз.

Низомга мувофиқ, суғурталанган шахсларга тайинланган давлат ижтимоий суғуртаси бўйича тўловларни тўлаш молиявий агент томонидан амалга оширилади.

Тайёрлаган: Отабек Матназаров

#ижтимоий суғурта