Россиялик актриса Вера Алентова вафот этди

Россиялик актриса Вера Алентова 84 ёшда вафот этди.

«Катта мусибат юз берди... Вера Валентиновна Алентова оламдан ўтди. У Пушкин театрида 60 йил хизмат қилганди», – дейилади театр тарқатган хабарда.

Алентова пайшанба куни Маяковский номидаги театрда актёр Анатолий Лобоцкий билан хайрлашув маросими чоғида ўзини ёмон ҳис қила бошлаган.

MSK1.RU портали хабарида тез ёрдам бригадаси актрисани театрдан замбилда олиб чиққанини қайд этган.

Шифокорлар уни жонлантиришга ҳаракат қилишган, аммо бу ҳаракатлар бесамар якунланган.

SHOT хабарига кўра, ўткир юрак етишмовчилиги ўлим сабаби сифатида қайд этилган.

Алентова Лобоцкий билан оддий совет аёли Сони ҳамда француз таржимон Андре ўртасидаги муҳаббат тарихи ҳақида ҳикоя қилинган «Зависть богов» («Худолар ҳасади», 2000 йил) филмида бирга ишлаганди.

66 ёшли Лобоцкий вафот этгани ҳақида 20 декабр куни хабар берилганди.

Алентова ўнлаб филмлар ва сериалларда роллар ижро этган, улар орасида «Звезды и солдаты» (1967), «Время желаний» (1984),

«Завтра была война» (1987), «Жених из Майами» (1994), «Ширли-мырли» (1995), «Бальзаковский возраст, или Все мужики сво…» (2007) кабилар бор.

Вера Алентовага энг катта машҳурликни «Москва слезам не верит» («Москва кўз ёшларга ишонмайди», 1979 йил) филми келтирган, у ўз турмуш ўртоғи, актёр ва режиссёр Владимир Меншов томонидан ишланган бу филмда бош ролдаги Екатерина Тихомировани ижро этган.

Москвани забт этиш учун келган уч дугона тақдири ҳикоя қилинган кинокартина совет кинопрокати етакчисига айланади ва 1981 йилда «Хорижий тилдаги энг яхши филм» номинациясида АҚШ киноакадемиясининг «Оскар» мукофотига лойиқ кўрилган.

Алентова Меншов билан ўтган асрнинг 60-йилларида турмуш қурган, уларнинг иккиси ҳам ўшанда Москва бадиий академик театри мактаб-студиясида таҳсил оларди. Уларнинг никоҳи қарийб 60 йил — Меншов 2021 йилда вафот этгунига қадар давом этди.

Уларнинг бир қизи бор – актриса ва телебошловчи Юлия Меншова (1969 йилда туғилган).

Алентова 60 йилдан ортиқ вақт мобайнида Пушкин номидаги Москва театрида хизмат қилади. 2022 йилда бу ерда актрисанинг 80 йиллигига бағишланган «Мадам Рубинштейн» спектакли премьераси қўйилганди.