Зеленский: 20 банддан иборат келишув 90 фоизга тайёр

Украинадаги урушни якунлаш бўйича 20 банддан ташкил топган тинчлик режаси 90 фоизга тайёр. Бу ҳақда Украина президенти Володимир Зеленский жума куни, 26 декабрда журналистлар билан онлайн мулоқот пайтида билдирди. “Бизнинг вазифамиз — ҳаммасини 100 фоиз тайёр ҳолатга келтириш”, — деди у ва “бу осон эмас”лигини таъкидлади.

Украина раҳбарининг сўзларига кўра, у 28 декабр куни АҚШ президенти Доналд Трамп билан режалаштирилган учрашувда Киев учун хавфсизлик кафолатларига оид ҳужжатлар тўплами, шунингдек ҳудудий масалалар ва иқтисодий ривожланишни муҳокама қилиш ниятида. Бу ҳақда РБК-Украина ёзади.

Бундан ташқари, Зеленский Москва тинчлик режасини имзолашга ҳеч қандай хоҳиш билдирмаётгани масаласини кўтармоқчи. “Россия доим рози бўлмаслик учун сабаб қидиради. <...> Агар Украина ўз позициясини кўрсатса — у конструктив, Россия эса, масалан, рози бўлмаса — демак босим кам”, — деб тушунтирди Украина президенти.

Зеленский шунингдек, Украинада президент сайловлари ва референдум ўтказиш бўйича қонунчилик ташаббуслари аллақачон мавжуд эканини, аммо бу борадаги асосий масала хавфсизликни таъминлаш эканини қайд этди.

Украина президенти таъкидлашича, якуний тинчлик шартномасини музокараларда иштирок этаётган тўрт томон — Украина, АҚШ, Россия ва Евроиттифоқ билан келишмасдан туриб имзолаб бўлмайди.

Зеленский офисида Украина ва Америка президентлари якшанба куни, 28 декабрда Флоридада учрашишини тасдиқлашди, деб хабар беради AFP агентлиги.

Бундан олдин Володимир Зеленский Доналд Трамп билан яқин кунларда учрашишини эълон қилган эди. “Бир кунни ҳам бой бермаяпмиз. Энг юқори даражада — президент Трамп билан яқин вақтда учрашув ҳақида келишиб олдик. Янги йилгача кўп нарса ҳал бўлиши мумкин”, — деб ёзган у ижтимоий тармоқларда.

Бир кун олдин Украина президенти АҚШнинг махсус вакили Стив Уиткофф ва Трампнинг маслаҳатчиси Жаред Кушнер билан “жуда яхши” телефон суҳбати ўтказганини билдирган. “Иш жараёнининг айрим муҳим тафсилотларини муҳокама қилдик. Қўшма натижа ва узоқ муддатли тинчлик йўлида иш бериши мумкин бўлган яхши ғоялар бор”, — деди Зеленский.

Аввалроқ у Вашингтон ва Киев томонидан келишилган, Украинадаги урушни тўхтатиш режасининг сўнгги вариантида Украина баъзи ён беришларга эришганини айтган эди. Зеленский эълон қилган 20 бандли ҳужжат, хусусан, фронтнинг ҳозирги чизиғини музлатиб қўйишни назарда тутади. Айни пайтда у қўшинларни олиб чиқиш ва демилитаризация қилинган зоналарни яратиш учун йўл очади.