Путин Запорожие шаҳрини эгаллаш учун ҳужумни давом эттиришни буюрди

Владимир Путин ҳарбийлар билан учрашувда Запорожие шаҳрини эгаллаш учун ҳужумни давом эттириш, шунингдек, Суми ва Харков вилоятларида «хавфсизлик зонаси» яратиш бўйича топшириқ берди.

«Албатта, яқин келажакда Запорожиени озод қилиш бўйича «Восток» гуруҳи билан биргаликда ҳужумни давом эттириш керак», деди Путин «Днепр» гуруҳи қўмондони Михаил Теплинскийнинг ҳисоботидан сўнг. Бундан ташқари, у 2026 йилда Украина билан чегарада Суми ва Харков вилоятларида «буфер зона» яратиш бўйича ишларни давом эттиришни топширди. Аввалроқ Путин ноябр ва май ойларида ҳам ҳарбийларга худди шундай топшириқ берган эди.

28 декабр куни Доналд Трамп Украина президенти Владимир Зеленский билан учрашуви якунлари бўйича ўтказилган матбуот анжуманида нутқ сўзлаб, унинг фикрича, Путин Украинадаги урушни тўхтатмоқчи эканини айтди.

«У жуда ишончли гапирди, мен унга ишонаман», деб таъкидлади Америка президенти. Трамп, шунингдек, Россия Украинани тиклашда ёрдам беришини ва арзон электр энергияси етказиб беришга тайёрлигини айтди. Шу билан бирга, у келажакда жанговар ҳаракатлар қайта бошланишидан қўрқиб, вақтинчалик ўт очишни тўхтатишни истамаётган Путиннинг позициясини «тушунишини» таъкидлади.

Reuters маълумотларига кўра, Путин Запорожие вилоятининг бутун ҳудудини эгаллаш кампаниясини давом эттиришни талаб қилган ва Россия қўшинлари Запорожие шаҳридан тахминан 15 км узоқликда жойлашгани таъкидланмоқда. Урушдан олдин бу шаҳарда 700 минг аҳоли истиқомат қилган.

Москва 2022 йилда Запорожие вилоятини Россиянинг бир қисми деб эълон қилган, аммо бу Украина ва дунёнинг аксарият давлатлари томонидан тан олинмаган.