Россияда Путиннинг умрини узайтириш бўйича дастур ишга туширилди — WSJ

Лойиҳа доирасида олимлар тўқималарни биопринтерлаш, ген терапияси ёрдамида ҳужайра қаришини секинлаштириш устида ишламоқда, шунингдек, чўчқалар ичида одамга кўчириб ўтказиш учун органларни ўстиришга ҳаракат қилмоқда.

Фото: Reuters

Россия ҳукумати кексайиб бораётган Владимир Путиннинг умрини узайтириш технологияларини излашга қаратилган 26 миллиард долларлик кенг кўламли дастурни ишга туширди, деб ёзди The Wall Street Journal.

Таъкидланишича, президентнинг қизи Мария Воронцова ва Путиннинг дўсти, Курчатов институти раҳбари Михаил Ковалчук бошчилигидаги лойиҳа доирасида олимлар тўқималарни биопринтерлаш, ген терапияси ёрдамида ҳужайра қаришини секинлаштириш устида ишламоқда, шунингдек, генетик жиҳатдан ўзгартирилган мини-чўчқалар ичида одамга кўчириб ўтказиш учун органларни ўстиришга ҳаракат қилмоқда.

Биринчи шундай чўчқа 2030 йилга бориб пайдо бўлиши керак. Кремль Путиннинг бешинчи муддати бошланганидан кейин бошлаган ва бюджетдан молиялаштириладиган «Соғлиқни сақлашнинг янги технологиялари» миллий лойиҳаси ҳам шу муддатга мўлжалланган.

WSJ таъкидлашича, 73 ёшли Путин ва унинг атрофидагилар ҳаётни узайтириш ва биотехнологияларга катта қизиқиш билдиряпти. Хусусан, Путин Хитой раиси Си Жинпинг билан суҳбатда умрбоқийлик ва органларни алмаштириш мавзусини кўтариб, бу орқали ҳаётни 150 йилгача узайтириш мумкинлигини таъкидлаган.

Аввалроқ Путин криотерапевтик амалиётларга ҳам қизиққан ва ҳатто Австриянинг ўша пайтдаги канцлери Себастян Курцга танани ёшартириш учун ўта паст ҳароратли криокамерани синаб кўришни тавсия қилган эди, деб ёзди WSJ.

Россиялик олимлар иккита асосий йўналишга эътибор қаратмоқда: биопринт (тирик тўқималар ва органларнинг 3D-босмаси) ва ксенотрансплантация - ҳайвонлар танасида одамга мос келадиган генетик жиҳатдан ўзгартирилган органларни ўстириш. Айрим тажрибаларда сичқоннинг тоғай тўқимаси ва қалқонсимон безининг биопринти ҳақида даъво қилинган. Кремль матбуот хизмати WSJ нашрига Россияда бу соҳада бир қатор илмий дастурлар бўйича ишлар олиб борилаётгани ва лойиҳалар давлат томонидан қўллаб-қувватланаётганини тасдиқлади.

Лойиҳани бошқараётган Путиннинг энг яқин дўстларидан бири Ковалчук аввалроқ илм-фан келажакда инсон танаси қисмларини «таъмирлаш» ва алмаштириш ҳамда инсон умрини узайтириш имконини бериши мумкинлигини айтган эди.